وزبەكستاندا ارال تەڭىزىنەن اكەلىنگەن اۋا ساتىلىپ جاتىر - فوتو

 استانا. قازاقپارات - قاراقالپاقستاننىڭ قاڭلىكول اۋدانىندا كونسەرۆىلەنگەن قۇتىداعى ارال تەڭىزىنىڭ اۋاسى كادەسىي رەتىندە ساتىلىپ جاتىر.

بۇل تۋرالى Gazeta.uz باسىلىمىنا سىلتەمە جاساپ Stan.kz حابارلايدى.

قاراقالپاقستاننىڭ قاڭلىكول اۋدانىنداعى جەكە كاسىپورىن كادەسىي رەتىندە كونسەرۆىلەنگەن قۇتىداعى ارال تەڭىزىنىڭ اۋاسىن شىعارىپ جاتىر. ولاردىڭ سىرتىندا «ارال تەڭىزى ءوڭىرىنىڭ اۋاسى» دەگەن جازۋ بار. سونىمەن قاتار ارال تەڭىزىنىڭ سپۋتنيكتەن تۇسىرىلگەن سۋرەتى بەينەلەنگەن.

ال وندىرۋشىلەردىڭ سوزىنشە، اتالعان كادەسىيدى ساتىپ العان تۋريست وزىمەن بىرگە اۋانى عانا ەمەس، ارال تەڭىزى مەن قاراقالپاقستان تۋرالى ەستەلىكتى دە الىپ كەتە الادى.

ايتا كەتسەك، ىشىندە اۋاسى بار كادەسىيلار الەمنىڭ كوپتەگەن مەملەكەتتەر مەن قالالاردا ساتىلادى. ولار اسىرەسە، تۋريستەردىڭ اراسىندا كەڭىنەن تانىمال.