قىتاي ەلشىلىگى وقۋشىلاردى قابىلدادى
قازاقستانداعى قىتاي ەلشىلىگى حالىقارالىق بالالاردى قورعاۋ كۇنى قۇرمەتىنە ارنايى قابىلداۋ ۇيىمداستىردى.
- ءبىز قىتاي ەلىنىڭ سالت- داستۇرىنە، تىلىنە، مادەنيەتىنە، تاريحىنا قىزىعۋشىلىق تانىتقان جاس دوستارىمىزدى مەرەكە قارساڭىندا قۇتتىقتايمىز، - دەدى قىتاي حالىق رەسپۋبليكاسىنىڭ قازاقستان رەسپۋبليكاسىنداعى ەلشىلىگىنىڭ ۋاقىتشا سەنىمدى ۋاكىلى ليۋ جيانپين. «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا ءبىلىم سالاسىندا قازاقستان مەن قىتاي اراسىنداعى بايلانىس جىل سايىن نىعايىپ كەلە جاتقانىن اتاپ ءوتتى. «زياتكەرلىك مەكتەپتەردىڭ كوپتەگەن تۇلەكتەرى قىتايدىڭ بەدەلدى جوعارى وقۋ ورنىندا وقىپ جاتىر. جاقىندا عانا زياتكەرلىك مەكتەپتەردىڭ دەلەگاتسياسى جۇمىس ساپارىمەن بەيجىڭ جانە شانحاي قالالارىندا بولىپ كەلدى. ءىس ساپار ناتيجەسىندە مەموراندۋمعا قول قويۋ جوسپارلانۋدا» ، دەدى ك. ءشامشيدينوۆا.
قازىرگى تاڭدا استانا قالاسىنداعى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىندە 80 نەن استام وقۋشى قىتاي ءتىلىن وقىپ ۇيرەنۋدە. ءتىل ۇيرەنۋدەگى ءوز جەتىستىكتەرىن وقۋشىلار «پەكين پالاس» بەس جۇلدىزدى قوناق ءۇيىنىڭ ۇلكەن زالىندا كورسەتتى. بالالار «مەنىڭ جۇرەگىمدەگى اي» ، «لوتوستار وسكەن بوگەتتەگى اي جارىعى» سياقتى قىتايدىڭ حالىق اندەرىن ناقىشىنا كەلتىرە ورىندادى. دومبىراشىلار توگىلتە ورىنداعان «سارىارقا» كۇيى مەرەكەنى ۇيىمداستىرۋشىلارعا جاسالعان كەرەمەت مۋزىكالىق سىي بولدى. كونفۋتسي ينستيتۋتىنىڭ بالالار توبى كورسەتكەن ۋ- شۋ جاتتىعۋى، ەلشىلىك كەڭەسشىسى چەن لە جۇرگىزگەن كالليگرافيادان شەبەرلىك ساعاتى، «كۇرىش تاياقشالارى» اتتى بي، استانالىق كادەتتەردىڭ تانىمال «كاتيۋشا» ءانىن قىتاي تىلىندە ورىنداۋى بالالار مەرەكەسىندەگى قىتايلىق رەڭدى ارتتىرا ءتۇستى.
«ەگەمەن- اقپارات»