زاعيپا باليەۆا سۋيتسيدكە قارسى بالالار قوزعالىسىن قۇرۋدى ۇسىندى

استانا. قازاقپارات - قازاقستاننىڭ بالا قۇقىقتارى جونىندەگى ۋاكىلى زاعيپا باليەۆا سۋيتسيدكە بالالار قوزعالىسىن قۇرۋدى ۇسىندى، دەپ حابارلايدى قازاقپارات ءتىلشىسى.

«سۋيتسيد بويىنشا 2017 جانە 2018 -جىلدىڭ العاشقى 4 ايىنا تالداۋ جۇرگىزىپ كوردىم. 2017 -جىلدىڭ باسىندا 64 سۋيتسيد وقيعاسى تىركەلسە، 2018 -جىلى - 49. ياعني، بالالار مەن جاسوسپىرىمدەر ااسىنداعى سۋيتسيد 23 پروتسەنتكە تومەندەگەن. وزىنە-ءوزى قول سالۋعا ارەكەتتەنۋ بويىنشا، 2017 -جىلدىڭ 4 ايىندا - 158 جاعداي، ال 2018 -جىلى - 107 جاعداي تىركەلگەن. وزىنە-ءوزى قول سالۋ ارەكەتى 32 پروتسەنتكە تومەندەگەن»، - دەپ اتاپ ءوتتى ومبۋدسمەن «بالالارعا ارنالعان ءادىل سوت: ناتيجەلەر، يننوۆاتسيالار جانە ودان ءارى دامۋى» كونفەرەنسياسىندا.

باليەۆا بۇل كورسەتكىشكە ەرتە قۋانباۋدى، بالالار اراسىنداعى سۋيتسيدتى تولىق جويعانشا جۇمىس ىستەۋ قاجەتتىگىن ايتتى جانە 2017 -جىلى 114 بالانىڭ سۋيتسيدتەن قۇتقارىلعانىن ەسكە سالدى.

«قازىر بۇل بالالار - ءبىزدىڭ دوستارىمىز، بىزبەن بىرگە جۇمىس ىستەيدى. بالكىم، بولاشاقتا جاسوسپىرىمدەر اراسىنداعى سۋيتسيدتىك رايدىڭ الدىن الاتىن قوعامدىق بالالار قوزعالىسىن قۇراتىن شىعارمىز»، - دەپ ءوز ءسوزىن تولىقتىردى زاعيپا باليەۆا.

بۇعان دەيىن ومبۋدسمەن قازاقستاندا بالالاردىڭ قۇقىقتارى مەن مىندەتتەمەلەرى جۇيەلەنەتىن جاڭا بالالار كودەكسى ازىرلەنىپ جاتقانىن حابارلاعان ەدى.