ۇيالى تەلەفونداردى تىركەۋ قاشان باستالادى؟

استانا. قازاقپارات - كەلەسى جىلدان باستاپ تىركەلمەگەن ۇيالى تەلەفوندار بايلانىستان اجىراتىلادى، دەپ حابارلايدى قازاقپارات ءتىلشىسى.

ق ر اقپارات جانە كوممۋنيكاتسيالار ءمينيسترى داۋرەن ابايەۆتىڭ ايتۋىنشا، ۇيالى تەلەفونداردى تىركەۋ شارالارى شىلدە ايىندا باستالادى. «نەگىزى، بارلىق پروتسەدۋرالىق ماسەلەلەر شەشىلگەن. تىركەۋ شارالارى شامامەن جارتى جىلعا سوزىلادى. دەگەنمەن، ءبىز اتالعان جۇمىستى بارىنشا وڭتايلاندىرۋعا تىرىسامىز. مىسالى، ابونەنتكە SMS-حابارلاما كەلەدى. ول ءوز كەلىسىمىن بەرسە بولدى. ول جاعىنان قيىندىقتار بولسا، جاقىن جەردەگى ۇيالى بايلانىس كەڭسەسىنە بارۋ قاجەت. سوسىن ونلاين تىركەۋ قىزمەتىن دە ىسكە قوسۋدى جوسپارلاپ وتىرمىز. مەنىڭشە، جىلدىڭ اياعىنا دەيىن ءبارىن ويداعىداي شەشەمىز»، - دەدى د. ابايەۆ حالىققا ەسەپ بەرۋ كەزدەسۋىندە.

ايتا كەتەيىك، بۇگىن مينيستر ابايەۆ كەلەسى جىلى تىركەلمەگەن تەلەفوندارعا ۇيالى بايلانىستىڭ قوسىلمايتىنىن تاعى ءبىر مارتە ەسكە سالدى.

«وسىدان ەكى جىل بۇرىن ۇيالى تەلەفوندادى تىركەۋدىڭ جاڭا ەرەجەلەرى قابىلدانعان بولاتىن. سودان بەرى ارنايى اقپاراتتىق جۇيە ازىرلەندى. ونى ىسكە اسىرۋدىڭ ارقاسىندا ۇيالى تەلەفونداردىڭ ۇرلىعىن ايتارلىقتاي ازايتۋعا بولادى. سەبەبى ىشكى ىستەر ورگاندارى ۇرلانعان تەلەفوندى IMEI- كود ارقىلى بىردەن بۇعاتتاي الادى.

«دەگەنمەن، IMEI- كودتىڭ كومەگىمەن تەلەفون يەسىن انىقتاۋ قيىن بولىپ تۇر. ال جاڭا نورمانى تولىققاندى ىسكە قوسۋ ءۇشىن IMEI- كودتى ادامنىڭ جەكە سايكەستەندىرۋ نومىرىمەن، سونداي-اق، تەلەفون نومىرىمەن بايلانىستىرۋ قاجەت. وسىلايشا، ۇيالى بايلانىس پايدالانۋشىلارى 2018-جىلدىڭ اياعىنا دەيىن ءوز قۇرىلعىلارىن تىركەپ قويۋى قاجەت. سەبەبى 2019-جىلى 1- قاڭتاردان باستاپ تىركەلمەگەن ابونەنتتەرگە قىزمەت كورسەتىلمەيدى»، - دەپ اتاپ كورسەتتى د. ابايەۆ.