ەلورداداعى فيلارمونيادا قازاق، كورەي كومپوزيتورلارىنىڭ شىعارمالارى ورىندالادى
مۇندا، ارنايى شاقىرتۋ العان سوليستەر قالامقاس جۇمابايەۆا (سكريپكا، قازاقستان) كيم حەن- سيل (ۆيولونچەل، وڭتۇستىك كورەيا) جانە ديريجەر يۋن كي-يەن (وڭتۇستىك كورەيا) ونەر كورسەتىپ، سيمفونيالىق مۋزىكاعا قۇرالعان كەشتىڭ ءسانىن كەلتىرەدى.
كونسەرتتە قازاق، ورىس، باتىس ەۋروپا جانە كورەيا كومپوزيتورلارىنىڭ شىعارمالارى ورىندالادى. مىسالى، پەتر چايكوۆسكيدىڭ بەسىنشى سيمفونياسى مي مينور ور. 64، انتونين دۆورجاكتىڭ سي مينور ور.104 (وركەسترمەن ۆيولونچەليدىڭ ورىنداۋىندا)، ەدىل قۇسايىنوۆتىڭ «قىپشاق جىرىن»، كورەي اندەرى تاقىرىبىنا ارنالعان سوي سۋڭ-حۆاننىڭ «اريرانگىن» ايتۋعا بولادى. سيمفونيالىق وركەستردىڭ باس ديريجەرى ەرنار نۇرتازين.
كيم حەن- سيل كورەي ەلىنىڭ تانىمال ۆيولونچەليسى، اكادەميالىق مۋزىكانىڭ كورنەكتى ناسيحاتتاۋشىسى. ول بەرلين مەملەكەتتىك مۋزىكا ۋنيۆەرسيتەتى مەن بلۋمينگتون قالاسىنداعى ءۇندىستان ۋنيۆەرسيتەتىنىڭ تۇلەگى.
كيم حەن- سيل «Seoul Arts Center Composition Festival» ،«Dajeon Modern Music Festival» ،«Dajeon Chamber Festival» ،«Dajeon Arts Center Chamber Society» جانە ت. ب فەستيۆالدەرگە سوليست ساناتىندا شاقىرىلعان ونەرپاز.
سونداي-اق، ول Dajeon Philharmonic Orchestra, Dajeon arts orcherstra ،Festival Orchestra ،Bella String Ensemble ،Daedeok Orchestra, PCBC Orchestra ،Cheongju Chamber Orchestra سىندى وركەسترلەرمەن بىرگە ونەر كورسەتكەن.
كيم حەن- سيل «Sony music Korea» كومپانياسىمەن بىرلەسىپ «Soul Cello CD» اتتى البوم جازعان، سونىمەن قاتار «Soul Cello-Spiritual Songs» اتتى نوتا داپتەرىن شىعارعان.
يۋن كي-ەن سەۋل مەملەكەتتىك ۋنيۆەرسيتەتىنىڭ تۇلەگى. ول وركەسترلىك اسپاپتار (كلارنەت) فاكۋلتەتىندە وقىپ ءجۇرىپ، بۇكىلكورەيالىق تانىمال «دونگ- ا» بايقاۋىنا قاتىسىپ، جەڭىمپاز اتانعان. بۇل بايقاۋدان كەيىن، يۋن كي-يەننىڭ ەسىمى ەلگە تانىلىپ، ونى وڭتۇستىك كورەيانىڭ ءتۇرلى وركەسترلەرى سوليست رەتىندە شاقىرا باستادى.
اتاقتى مۋزىكانتتىڭ شىعارماشىلىق جولىندا تاعى ءبىر ماڭىزدى جەڭىس كورەيلىك حابار تاراتۋ جۇيەسىنىڭ (KBS) ءبىرىنشى سىيلىعى بولدى. بۇل جەڭىس ونىڭ ابىرويىن اسقاقتاتتى. ەلدىڭ مويىنداۋىنا سەبەپكەر بولدى.
يۋن كي-يەن ديريجەر رەتىندە پەتروزاۆودسك كونسەرۆاتورياسىنىڭ وركەسترىندە، كارەل فيلارمونيالىق وركەسترىندە، ادىگەيا رەسپۋبليكاسىنىڭ فيلارمونيالىق وركەسترىندە دونەتس فيلارمونيالىق وركەسترىندە، ارىمداۋن جانە ت. ب وركەسترلەردە قىزمەت اتقارعان.
قازىرگى تاڭدا يۋن كي-يەن ماسكەۋ فەستيۆالدى وركەسترىنىڭ جانە ماسكەۋ سيمفونيالىق وركەسترىنىڭ، سونداي-اق، ۇلتتىق سيمفونيالىق وركەسترىنىڭ ارنايى شاقىرتىلعان ديريجەرى، سونىمەن بىرگە گوڭ-زۋ مەملەكەتتىك پەداگوگيكالىق ۋنيۆەرسيتەتىنىڭ مۋزىكالىق فاكۋلتەتىنىڭ پروفەسسورى بولىپ تابىلادى.
قالامقاس جۇمابايەۆا ق ر تۇڭعىش پرەزيدەنتى - ەلباسىنىڭ قورى سىيلىعىنىڭ يەگەرى، م. ستيحارج جانە ب. ۆايكل اتىنداعى بايقاۋىنىڭ، حالىقارالىق «ەۋرازيا» كونكۋرسى سىندى كوپتەگەن حالىقارالىق جانە رەسپۋبليكالىق فەستيۆالدەردىڭ جەڭىسپازى.
ول «قازاقستان كامەراتاسى» (1999-2009)، قازاقستان رەسپۋبليكاسىنىڭ مەملەكەتتىك سيمفونيالىق وركەسترى (2009-2014)، الماتى سيمفونيالىق وركەسترى «ASO» (2012-2013)، «استانا وپەراسى» تەاترىنىڭ سيمفونيالىق وركەسترى (2014-2016)، ماريين تەاترىنىڭ سيمفونيالىق وركەسترلەرىندە (2016-2017) قىزمەت اتقارعان. قالامقاس جۇمابايەۆا ۆ. گەرگيەۆ، ش. ديۋتۋا، ە. ليپەر، ك. دجەنكينس، ا. انيسيموۆا، ي. ۆيلدنەر، ە. بۋشكوۆ، ا. اللەماندي، م. گيۋتتلەر، پ. دومينگو سىندى ايگىلى تالانتتارمەن ارىپتەس بولدى.