ارالدىق ايەل ۇمىتىلىپ بارا جاتقان الاشا توقۋمەن اينالىسادى

قازالى. قازاقپارات - ارال اۋدانى شومىشكول اۋىلىنىڭ تۇرعىنى گۇلنار اناپيايەۆا ۇمىت بولىپ بارا جاتقان توقىما ونەرىمەن اينالىسادى، دەپ حابارلايدى قازاقپارات ءتىلشىسى.

ءبىلىم سالاسىندا 40 -جىلداي جۇمىس ىستەگەن گۇلنار ءجۇسىپ قىزى زەينەت دەمالىسىنا شىققان سوڭ الاشا توقۋ ونەرىنە شىنداپ كىرىسكەن.

«الاشا توقۋدى انام مەن اجەمنەن ۇيرەندىم. وسى ىسكە دەن قويعاندا اۋىلداعى اپالار قاتتى قۋاندى. وزدەرىنىڭ بار بىلگەندەرىن ايتىپ، ورمەك اعاشتارىن بەرىپ، قولداۋ كورسەتتى. جاس قىز- كەلىنشەكتەر دە ءجىپ ءيىرىپ، ءجۇن ءتۇتىپ، بوياۋ جۇمىستارىندا قول كومەكتەرىن اياماۋدا»، - دەيدى گۇلنار ءجۇسىپ قىزى.

 

شەبەردىڭ ايتۋىنشا، الاشا توقۋدىڭ شىم تەرۋ، ارا تەرۋ، قوراسان تەرۋ، تەرىس بۇتاق سىندى تۇرلەرى بار.

«بۇل ونەر اسقان ىجداعاتتىلىقتى تالاپ ەتەدى. قاراپايىم كەرەگە تاڭعىشتى توقۋ ءۇشىن كەم دەگەندە 2- 3 كۇن ۋاقىت جۇمسايمىز، باسقۇردى توقۋعا 1-1,5 اي كەتەدى»، - دەيدى ول.

گۇلنار ءجۇسىپ قىزى الاشا توقۋ ىسىنە كىرىسكەن شاقتان باستاپ، شەبەرلىگىن ودان ءارى شىڭداپ كەلەدى. وبلىس، اۋدان كولەمىندە وتكەن شەبەرلىك ساباقتارىنا قاتىسىپ، ءوز ونەرىمەن تانىلىپ ءجۇر.

«وبلىس بويىنشا الاشا توقۋمەن اينالىساتىن ەكى-اق ادام بار. ونىڭ ءبىرى - قارماقشى اۋدانىندا تۇرسا، ەكىنشىسى - مەن. وتكەن جىلى ەكسپو كورمەسى اياسىندا وتكەن «قورقىت جانە ۇلى دالا سازى» اتتى فەستيۆالگە بۇيىمدارىمدى اپاردىم. ءتۇرلى ورنەكتەرمەن توقىلعان الاشالارىم كەلۋشىلەردىڭ ەرەكشە نازارىن اۋدارتتى. ءتىپتى، شىمكەنت، اقتوبە، الماتى وبلىسىنان كەلگەن قوناقتار مۇراجايلارعا قويۋعا ارنايى تاپسىرىس بەرىپ، توقىتىپ الدى. جان-جاقتان كەلگەن قولونەر شەبەرلەرىنىڭ باسىن قۇراعان بۇل فەستيۆال مەنىڭ بىلىكتىلىگىمدى ارتتىرۋىما سەپتىگىن تيگىزدى»، - دەدى گۇلنار اپا.

قازىرگى كۇنى الاشا توقۋدان باسقا، كيىزدەن ءتۇرلى كادەسىي دايىندايتىن گۇلنار ءجۇسىپ قىزىنىڭ ونەرىنە قىزىعاتىندار كوبەيگەن. اسىرەسە، اۋىلداعى جاس كەلىنشەكتەر مەن وقۋشى قىزدار شەبەرلىك ساباعىن الىپ ءجۇر.