رەسەيدىڭ ترويتسك قالاسىندا «ايقاپ» قازاق ۇلتتىق- مادەني قوعامدىق بىرلەستىگى قۇرىلدى
قوستاناي وبلىسى اكىمدىگىنىڭ تىلدەردى دامىتۋ باسقارماسىنىڭ ءبولىم باسشىسى باقىتگۇل سۇلەيمەنوۆا ايتقانداي، «ايقاپ» قازاق ۇلتتىق- مادەني قوعامدىق بىرلەستىگى رەسەيدىڭ چەليابى وبلىسى باسشىلىعىنىڭ قولداۋىمەن قۇرىلدى.
«چەليابى وبلىسىندا 40 مىڭعا جۋىق قانداسىمىز تۇرادى. سوڭعى جىلدارى سول جاقتاعى قازاق جاستارىنىڭ ۇلتتىق قۇندىلىقتارعا دەگەن ىنتاسى ەرەكشە. سول سەبەپتى مۇنداي بىرلەستىك ترويتسك قالاسىندا دا اشىلدى. ونىڭ نەگىزگى ماقساتى قازاق دياسپوراسى وكىلدەرىنىڭ ۇلتتىق قۇندىلىقتاردى جوعالتپاي، سالت- داستۇرلەر مەن قازاق ءتىلىن ۇمىتپاۋى ءۇشىن جاڭا سەرپىلىسپەن جۇمىس ىستەۋ بولىپ وتىر. جاڭادان قۇرىلىپ وتىرعان «ايقاپ» الدىمەن دياسپورا وكىلدەرىنە قازاق ءتىلى ساباعىن وقىتۋدى قولعا الادى. بۇعان قوسا، بىرلەستىك ماماندارى الداعى قىركۇيەكتەن باستاپ لاتىن ءالىپبيىن ۇيرەتەدى. سەبەبى، قازىردىڭ وزىندە ترويتسك قالاسىنداعى قانداستار لاتىن قارپىن ۇيرەنۋگە قۇلشىنىس تانىتۋدا»، - دەدى باقىتگۇل سۇلەيمەنوۆا.
«ايقاپ» قوعامدىق بىرلەستىگى دۇنيەءجۇزى قازاقتارىنىڭ قاۋىمداستىعى قوستاناي وبلىستىق فيليالى جانە وبلىستىق تىلدەردى دامىتۋ باسقارماسىمەن تىعىز بايلانىستا جۇمىس ىستەمەك. اتالعان ورتالىقتىڭ قۇرامىندا 25 ادام بار. «ايقاپتى» قۇرعان ىنتالى توپ ونىڭ جۇمىسىنا جاستاردى تارتۋدى كوزدەيدى.
اۆتور: قاسقىرباي قويشىمانوۆ