قازاقستانعا قىرعىزستاننان كەلەتىن كوكونىستەر كولەمى ارتپاق
ءىس ساپار اياسىندا كارىم كوكىرەكبايەۆ «ايشا ءبيبى» - «چوڭ كاپكا» باقىلاۋ-وتكىزۋ بەكەتىنە باردى. ەلشى قازاقستان مەن قىرعىزستاننىڭ شەكارالىق قىزمەت وكىلدەرىمەن ءبىرقاتار كەدەندىك ماسەلەلەردى تالقىلادى.
«اتاپ ايتقاندا، دەزينفەكتسيالىق توسقاۋىلعا جوندەۋ جۇمىستارىن جۇرگىزۋ، قازاقستاندىق تاراپتاعى باقىلاۋ-وتكىزۋ بەكەتىنىڭ عيماراتىن كۇردەلى جوندەۋدەن وتكىزىپ، اينالاسىن قورشاۋ قاجەتتىگى تالقىلاندى، - دەپ ءتۇسىندىردى قىرعىزستانداعى قازاقستان ەلشىلىگى. - ودان بولەك، قىرعىزستانداعى جەمىس پەن كوكونىستىڭ العاشقى لەگى جينالعاندىقتان، اتالعان وتكىزۋ-باقىلاۋ بەكەتتەرى كولىكتىك جۇكتەمەنىڭ ۇلعايۋىنا دايىندالىپ جاتىر».
2018-جىلعا جوبالىق-سمەتالىق قۇجاتتاما ازىرلەنىپ، بەكەت اۋماعىندا اۆتوكولىك تۇراعىن ورناتۋ مەن جول جابىنىن جوندەۋ جۇمىستارى قاراستىرىلعان. كەدەنشىلەردىڭ ايتۋىنشا، بۇل شارالار مەملەكەتتىك شەكارانى كەسىپ وتەتىن ازاماتتارعا قىزمەت كورسەتۋ ساپاسىن جاقسارتادى.
سونىمەن بىرگە، ەلشىلىك «جول كارتاسى» بولىكتەرىن جۇزەگە اسىرۋ اياسىندا ءساۋىر ايىندا الماتىدا ق ر پرەمەر- ءمينيسترىنىڭ ورىنباسارى - ق ر اۋىل شارۋاشىلىعى ءمينيسترى ءومىرزاق شوكەيەۆ پەن قىرعىزستاننىڭ اۋىل شارۋاشىلىعى، مەليوراتسيا جانە ازىق-تۇلىك ونەركاسىبى ءمينيسترى نۇربەك مۇراشيەۆتىڭ كەزدەسۋى وتكەنىن ەسكە سالدى. كەدزەسۋ بارىسىندا اۋىل شارۋاشىلىعى سالاسىنداعى ەكىجاقتى ىنتىماقتاستىقتىڭ وزەكتى ماسەلەلەرى كوتەرىلدى. ودان بولەك، كەزدەسۋدە فيتوسانيتارلىق جانە ۆەتەرينارلىق باقىلاۋ ماسەلەلەرى قارالدى. ەكى ەلدىڭ اۋىل شارۋاشىلىعى مينيسترلەرىنىڭ ايتۋىنشا، بۇل ماسەلەلەردى شەشۋ قازاقستان مەن ە ا ە و نارىعىنا جىبەرىلەتىن قىرعىزستاندىق ءونىم كولەمىن ۇلعايتادى.