اقتوبەدە بوگەنباي باتىردىڭ ەسكەرتكىشىن سالۋ جۇمىستارى باستالدى

اقتوبە. قازاقپارات - اقتوبەدە ايگىلى قازاق باتىرلارىنىڭ ءبىرى - بوگەنبايعا ەسكەرتكىش ورناتۋ جۇمىستارى باستالدى.

ەسكەرتكىش اۋەجاي ماڭىندا جەرگىلىكتى جانە قازاقستاننىڭ وزگە دە وڭىرلەرىندەگى كاسىپكەرلەردىڭ قارجىسىنا سالىنباقشى، دەپ حابارلايدى قازاقپارات اقتوبە وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.

قۇرىلىس جۇرەتىن الاڭدى وبلىس اكىمى بەردىبەك ساپاربايەۆ كەلىپ كوردى.

«ىرگەسى گرانيتتەن تۇرعىزىلىپ، ءمۇسىنى قولادان جاسالعان ەسكەرتكىشتىڭ بيىكتىگى 16 مەتردەن اسادى. ەسكەركىشتىڭ قۇنى 150 ميلليون تەڭگەدەن كوپ. ەسكەرتكىشتىڭ ارتىنا بوگەنباي باتىر قول باستاعان، قازاقتىڭ ءۇش ءجۇزىنىڭ باسى بىرىككەن تاريحي كەزەڭدەردى بەينەلەيتىن پانوراما قويىلادى. ەسكەرتكىشتە باتىر قولىنا سەمسەر ەمەس قازاق ۇلتتىق اسكەرىنىڭ تۋىن ۇستاپ تۇرادى»، - دەدى ەسكەرتكىش قۇرىلىسى جونىندەگى قوعامدىق كەڭەستىڭ باسشىسى مالىك جاكەيەۆ.

ەسكەرتكىشتىڭ ماڭىنداعى 1,5 گەكتار جەر كوگالداندىرىلىپ، وندا بالالار جانە سپورت الاڭدارى، كولىكتەر تۇراقتايتىن ورىن سالىنادى. ال بۇل ماقساتقا قارجىنى جەرگىلىكتى بيلىك بولەدى.