بۇيرەك دەرتى ينفاركتكە سەبەپ
ونىڭ بىرنەشە سەبەپتەرى بار. مىسالى، بۇيرەك جەتىسپەۋشىلىگى كەزىندە اعزادا فوسفور مەن كالتسي الماسۋى ناشارلايدى. بۇدان تامىرلاردا كالتسي ىركىلۋى، ترومبوز پايدا بولادى. وسى سەبەپتى بۇيرەك دەرتىنەن زارداپ شەگەتىندەردىڭ باسىم بولىگى ينفاركت، ينسۋلت الادى ەكەن. بۇيرەكتىڭ سوزىلمالى اۋرۋلارى اسا قاۋىپتى. ونى ماماندار بۇگىندە قاتەرلىلىگى جاعىنان وبىر، وكپە، قانت ديابەتى اۋرۋلارىمەن قاتار قويىپ وتىر. بۇدان بولەك، اتالعان اۋرۋلاردىڭ وزدەرى دە كوپ جاعدايدا بۇيرەكتىڭ سوزىلمالى كەسەلدەرى تۋىنداۋىنا سەبەپ بولادى.
بۇيرەك ارتەريالىق قان قىسىمىن رەتتەيدى، گەموگلوبين سينتەزدەيدى، سۋ جانە ليپيدتەر الماسۋىنا، قىشقىل- ءسىلتى تەپە- تەڭدىگىنە جاۋاپتى، يممۋندىق جۇيەنىڭ كەيبىر فۋنكتسيالارىن اتقارادى. سوندىقتان بۇيرەكتەگى قانداي دا ءبىر قالىپسىزدىقتىڭ بۇكىل اعزاعا اسەرى بار. ال جاعداي ۋشىقسا، گەموستاز (اعزانىڭ ىشكى تۇراقتىلىعى) بۇزىلۋىنان ناۋقاس ولەدى. ال بۇيرەكتە تۋا ءبىتتى اقاۋ بولعان جاعدايدا ول گورموندىق، ەندوكريندىك، نيەۆروگەندىك قالىپسىزدىقتار كەسىرىنەن كۇشەيە بەرەدى. زات الماسۋىنىڭ بۇزىلۋىنان تۋىنداعان سەمىزدىك، اعزاعا ارتىق ماي جينالۋى دا بۇيرەككە قاۋىپتى. ۇلپالار قان قۇرامىنداعى قانتتى دۇرىس سىڭىرە الماي، سول سەبەپتى ينسۋلين كوپ تۇزىلەدى، ول گيپەرتونياعا، ديابەتكە، سوسىن بۇيرەك جۇمىسىنىڭ بۇزىلۋىنا سوقتىرادى. بۇيرەككە سونىمەن قاتار اسا كوپ الكوگول، نيكوتين، كالورياسى جوعارى تاعامدار، قيمىل- قوزعالىستىڭ ازدىعى دا اۋىر تيەدى. بۇيرەك اۋرۋى بىردەن بىلىنبەيدى. ول بۇيرەك جەتىسپەۋشىلىگى پايدا بولىپ، ۋشىققاسىن عانا بەلگى بەرەدى. سوندىقتان بۇيرەكتى ۋاقتىلى تەكسەرتىپ تۇرعان ابزال.
سىنامالار تاپسىرۋ قاجەت. بۇيرەك اۋرۋىنىڭ العاشقى بەلگىلەرى: سىنامادا البۋمين، زاردە اقۋىزدار انىقتالادى، بيوحيميالىق سىناما كەزىندە قاندا كرەاتين مولشەرىنىڭ ارتقانى انىقتالادى. گيپەرتونيا، اتەروسكلەروز، سەمىزدىك، قانت ديابەتى سياقتى دەرتپەن اۋىراتىن توپتاردى سكرينينگتىك تەكسەرۋ كەزىندە دە بۇيرەك دەرتى تۋىنداعانداردى انىقتاۋعا بولادى. ادام سەبەپسىز تەز شارشاي بەرسە، دىڭكەلەسە، ۇنەمى سۇرلانىپ جۇرسە، وندا ۋاقىت وتكىزبەي دارىگەرگە كورىنگەنى ابزال. بۇيرەك اۋرۋلارىنىڭ اقاۋى سوزىلمالى بۇيرەك جەتىسپەۋشىلىگىنە سوقتىرادى. مۇندايعا دۋشار بولعاندارعا گەمودياليز اپپاراتىمەن ءومىر سۇرۋگە نەمەسە بۇيرەك الماستىرىپ سالاتىن ترانسپلانتولوگتار جاردەمىنە جۇگىنۋگە تۋرا كەلەدى.
سونداي- اق ناۋقاستىڭ قۇرساق اۋماعىنا ارنايى كاتەتەر ورناتۋ ءتاسىلى دە بار. ياعني ول قۇرساعىنا الدىن- الا دايىنداعان ەرىتىندى قۇيادى، ول اعزانى ۋلى زاتتاردان تازارتادى، ياعني بۇيرەك جۇمىسىن اتقارادى. مىنە، وسىنداي قاتەرلەرگە ۇرىنباس ءۇشىن ادام ءوزىنىڭ بۇيرەك ساۋلىعىنا قامقور بولۋى كەرەك. بىرىنشىدەن، دەنە سالماعىنىڭ قالىپتان اۋىتقىماۋىن قاداعالاعان ابزال. سەبەبى سەمىرگەن كەزدە ماي جينالىپ، ارتىق ماي ۇلپالارى تامىر تونۋسىن تومەندەتەتىن كومپونەنتتەر تۋىنداتادى. ودان بۇيرەككە مەحانيكالىق سالماق تۇسەدى،
جۇمىسىن قيىنداتادى. سونداي- اق بىردەن ارىقتاۋ دا قاۋىپتى. ويتكەنى بۇيرەك سىرتى مايلى قاپشىقپەن قاپتالعان، ادام ازىپ- توزعان كەزدە ول جۇقارادى دا، بۇيرەكتى قورعاۋ قابىلەتى ازايادى. ادام اقۋىزدى كوپ پايدالانباۋى كەرەك. ونىڭ ارتىق مولشەرى بۇيرەك جۇمىسىن اۋىرلاتادى. كۇنىنە 2 ليتر سۇيىق ءىشىپ تۇرعان دۇرىس. ول قان اينالىمىنا كومەكتەسەدى، بۇيرەكتە ارتىق زياندى زاتتار ىركىلۋىنە جول بەرمەيدى. كىشى دارەتكە دە دەر كەزىندە شىعىپ تۇرعانى دۇرىس. ويتكەنى تابيعي سۇرانىسقا قارسى، ءوزىن ۇزاق تەجەسە نەسەپ قابىندا ينفەكتسيالار كوبەيۋى مۇمكىن. ءتاتتىنى، اشىنى، تۇزدىنى، قۋىرىلعان تاعامدى كوپ جەمەڭىز. ويتكەنى بۇلار قانت ديابەتىنە، ارتەريالىق گيپەرتونياعا سەبەپكەر. ال ولار ءوز كەزەگىندە بۇيرەك جەتىسپەۋشىلىگىن تۋىنداتادى.
zamana.kz