وزبەكستان قىزىلوردا وبلىسىنان مول كولەمدە تۇيە ساتىپ الدى

استانا. قازاقپارات - وزبەكستان قازاقستاننان ءىرى كولەمدە تۇيەلەر ساتىپ الدى.

اتاپ ايتقاندا، تۇيە شارۋاشىلىعىن دامىتۋ ماقساتىندا وزبەكستاننىڭ تامدىن اۋدانى وك تاكير كەنتىنە قازاقستاننىڭ قىزىلوردا وبلىسىنان 1 مىڭ 500 تۇيە ساتىپ اكەلىندى. ولاردىڭ اراسىندا تۇيەنىڭ ءسۇتتى مول بەرەتىن انالىق تۇقىمدارى دا بار، دەپ جازادى ۋزا.

«تۇيەلەردى ءوسىرۋ ءۇشىن 61 مىڭ 814 گەكتار جەر ءبولىندى. كەلەسى جىلعا دەيىن بۇل جەردەن تۇيە ءسۇتى - شۇبات جاساپ شىعارىلاتىن سەح اشۋ جوسپارلانىپ وتىر. بۇل تەك جاڭا جۇمىس ورىندارىن اشۋعا مۇمكىندىك بەرىپ قانا قويماي، حالىقتىڭ ءال-اۋقاتىن ارتتىرۋعا ىقپال ەتەتىن بولادى. بۇدان بولەك، تۇيەنىڭ ءجۇنىن ءتيىمدى قولدانۋ بويىنشا شارالار جاسالۋدا»، - دەپ اتاپ ءوتتى «ناۆوي-كوراكۋل» قاۋىمداستىعىنىڭ ءتوراعاسى ۋ. حاليلوۆ.

سونداي-اق، وسى ماقساتتى كانيمەح اۋدانىندا 3 مىڭنان استام تۇيە ءوسىرىلىپ جاتقان ۇلكەن اۋماق بولىنگەن.

بىلتىر وسى اۋدانعا تۇيەگە ءمىنۋ ءۇشىن، سونداي-اق ادامنىڭ يممۋندىق جۇيەسىنە قۋات بەرەتىن شۇباتتان ءدام تاتۋ ءۇشىن مىڭداعان تۋريست كەلگەن.

ايداركول ماڭىندا 1000 تۇيەگە ارنالعان زاماناۋي مال شارۋاشىلىعى كەشەنىن ۇيىمداستىرۋ كوزدەلىپ وتىر. بۇل كەشەندە جىلىنا 1000 توننا شۇبات وندىرىلمەك. بولاشاقتا ونى جىلىنا 10 مىڭ ءتۋريستى قابىلدايتىن قازىرگى زامانعى ەكوتۋريستىك ورتالىققا اينالدىرۋ جوسپاردا بار.