نۇرسۇلتان نازاربايەۆ: مەشىتتە ناماز وقۋ ءۇشىن دە ءبىلىم كەرەك
«مىسالى، قازاق تىلىنە اۋدارىلعان ءدىني كىتاپتاردى پاراقتاعاندا ءبىر ماسەلەنى ويلادىم، اتا-بابالارىمىز سونىڭ ءبارىن بىلگەندە ەكسترەميستەرگە دە، تەرروريستەرگە دە ناقتى جاۋاپ بەرەتىن ەدى. ولاردىڭ قايدان شىققانىن دالەلدەيتىن ەدى. سوندىقتان الدىمەن ءدىننىڭ تاريحىن ءبىلۋ كەرەك. جاراتۋشى ءبىر، وعان جەتۋ جولدارى ءارتۇرلى. الەمدىك جانە ءداستۇرلى دىندەر سەزىن وتكىزگەندە ءبارى سول تۋرالى ايتادى. سوعان قاراماستان، دىندەردىڭ ءوز ىشىندە سوعىستار تولاستار ەمەس. مىناۋ مۇسىلماندار اراسىنداعى قىرعىن سوعىس ەۋروپادا ورتا عاسىردا بولعان. قازىر ءبىز سول كەزەڭنەن ءوتىپ جاتىرمىز. ولار بىزگە دەيىن ءوتىپ كەتكەن»، - دەدى ن. نازاربايەۆ.
پرەزيدەنتتىڭ ايتۋىنشا، ءدىني قىزمەتكەرلەر «100 جاڭا وقۋلىق» اياسىندا ءوز بىلىمدەرىن شىڭداپ، ساۋاتى اشىلماعان جاستاردى دۇرىس جولعا سالۋى ءتيىس.
«جالپى، بارىمىزگە ءبىلىمدى شىڭداپ وتىرۋ قاجەت. ايتپەسە، ءبارىمىز دىندە ءجۇرمىز، ءبارى ناماز وقيدى. بۇگىندە جۇرت قاپتاپ مەشىتكە بارادى. ال ىشىندە ساناسى مەن تۇسىنىگى قانداي؟ قۇر اشەيىن، ەلمەن بىرگە شۋىلداپ جۇرە بەرۋ كەرەك دەپ ويلايدى. ولاي ەمەس. ءاربىر نارسەنىڭ ءوزىنىڭ ماعىناسى بار. سونىڭ ءبارىن دۇنيەجۇزىندە كەڭىنەن تالقىلاعان، تۇبىنە جەتكەن»، - دەپ اتاپ كورسەتتى ەلباسى.
مەملەكەت باسشىسى «100 جاڭا وقۋلىق» جوباسىنا ەنگەن كارەن ارمسترونگتىڭ «قۇداي تانۋ بايانى» اتتى كىتابىن مىسالعا كەلتىردى. اتالعان ەڭبەكتە اۆتور ادام ساناسىنداعى قۇدايعا دەگەن سەنىمنىڭ ءتۇپ تامىرى ءبىر ەكەنىن دالەلدەيدى. «ءبىزدىڭ ءدىن ادامدارىنا، يدەولوگيا سالاسىندا جۇرگەن ازاماتتارىمىزعا باسقالارمەن سويلەسكەندە وسىنى ايتۋعا بولادى. ادام ساناسىندا قۇدايعا سەنىمنىڭ ءتۇپ-تامىرى ءبىر ەكەنىن تۇسىنەتىن بولساق، ءوزارا تۇسىنىستىك، ءدىنارالىق كەلىسىم بولادى. ءبىزدىڭ پايعامبارىمىز - مۇحاممەد (س. ع. س.) بارلىق دىندەردى سىيلاعان. قۇراننىڭ ىشىندە دە ءاربىر دىنگە قاتىستى ماعلۇمات بار. ال ءبىزدىڭ كەيبىر ازاماتتارىمىز ونى دا بىلمەيدى»، - دەدى ن. نازاربايەۆ.