قازاقستان-وزبەكستان جىلناماسىنىڭ جاڭا پاراعى اشىلدى

استانا. قازاقپارات - قازاقستان وزبەكستانمەن كوپ جوسپارلى ىنتىماقتاستىقتى ودان ءارى نىعايتۋعا نيەتتى. بۇل تۋرالى بۇگىن اقوردادا ءبىرقاتار شەتەل ەلشىسىنەن سەنىم گراموتاسىن قابىلداعان ەلباسى نۇرسۇلتان نازاربايەۆ ايتتى، دەپ حابارلايدى قازاقپارات.

«وزبەكستان رەسپۋبليكاسىمەن ءبىزدى بىرنەشە عاسىرلىق مادەنيەتتەر مەن داستۇرلەر دوستىعىنىڭ دانەكەرى بايلانىستىرىپ تۇر. قازاقستاندىق-وزبەكستاندىق قارىم-قاتىناستىڭ ودان ارى دامۋىنا وزبەكستاننىڭ قۇرمەتتى پرەزيدەنتى شاۆكات ميرزيەيەۆ ۇلكەن ۇلەس قوسۋدا. ول كەلگەننەن كەيىن ءبىز استانا مەن تاشكەنت ىنتىماقتاستىعىنىڭ جاڭا جىلناماسىن اشتىق. سونىمەن قاتار ورتالىق ازيا ەلدەرىنىڭ ىنتىماقتاستىعىن نىعايتۋدا ايتارلىقتاي پروگرەسكە قول جەتكىزدىك»، - دەدى ەلباسى.

مەملەكەت باسشىسى اعىمداعى جىلى ورىن العان ءوزارا ساپارلار، سونىمەن بىرگە ءتۇرلى حالىقارالىق الاڭدارداعى قارقىندى بايلانىستار ساياسي رۋحتى ايتارلىقتاي نىعايتا تۇسكەندىگىن باسا ايتتى.

«العاش رەت ءوزارا ساۋدا ءوسىمىن 30 پايىزدان استامعا قامتاماسىز ەتتىك. اعىمداعى جىلى وزبەكستاننىڭ قازاقستانداعى جىلىنىڭ باستالۋى، كەلەسى جىلى باۋىرلاس وزبەكستاندا قازاقستان جىلىن وتكىزۋ جاڭا جاڭالىقتاردىڭ مەجەسىنە اينالادى جانە ءبىزدىڭ ىنتىماقتاستىعىمىزدىڭ بارلىق سپەكترىنە تىڭ سەرپىن بەرەدى. قازاقستان وزبەكستانمەن كوپجوسپارلى ىنتىماقتاستىقتى ودان ارى نىعايتۋعا نيەتتى»، - دەدى نۇرسۇلتان نازاربايەۆ.

قازاقستان پرەزيدەنتىنە سەنىم گراموتاسىن تاپسىرعاننان كەيىن ب ا ق وكىلدەرىمەن بريفينگ وتكىزگەن وزبەك ەلشىسى سايديكرام نيازحودجايەۆ وزبەكستان ءۇشىن قازاقستان ۋاقىت سىنىنان وتكەن ستراتەگيالىق سەرىكتەس سانالاتىندىعىن ايرىقشا اتاپ ءوتتى.

«بۇل رەتتە قىسقا عانا ۋاقىت ارالىعىندا ەكىجاقتى قارىم-قاتىناستارىمىزدىڭ جاڭا پاراعىن اشقان ەكى پرەزيدەنتتىڭ جەكە ءوزارا قارىم-قاتىناسىن اتاپ وتكەن ءجون. تەك وتكەن جىلى عانا جوعارى دەڭگەيدەگى 6، سونداي-اق مينيسترلىكتەر مەن ۆەدومستۆولار دەڭگەيىندە 20 دان استام كەزدەسۋلەر وتكىزىلدى»، - دەدى ول.

وزبەكستان ەلشىسى ەكى ەلدىڭ اراسىنداعى بارلىق سالاداعى ىنتىماقتاستىقتى ودان ارى تەرەڭدەتۋگە كۇش سالاتىندىعىن باسا ايتتى. سونىمەن قاتار ول وزبەكستاننىڭ قازاقستانداعى كۇندەرى اياسىندا 200 دەن استام شارا وتەتىندىگىن، تاشكەنت-الماتى-تاشكەنت جانە الماتى-تاشكەنت-الماتى جاڭا اۆتوبۋس باعىتتارىنىڭ اشىلاتىندىعىن ەسكە سالدى.

ايتا كەتەيىك، بۇگىن اقوردادا قازاقستان پرەزيدەنتى نۇرسۇلتان نازاربايەۆ ءبىرقاتار شەت مەملەكەتتەردىڭ توتەنشە جانە وكىلەتتى ەلشىلەرىنەن سەنىم گراموتالارىن قابىلدادى. ولاردىڭ قاتارىندا وزبەكستاننىڭ قازاقستانداعى توتەنشە جانە وكىلەتتى ەلشىسى ەلشىسى سايديكرام نيازحودجايەۆ تە بولدى.

سالتاناتتى شارا بارىسىندا ەلشىلەرگە ءسوز ارناعان نۇرسۇلتان نازاربايەۆ اعىمداعى جىلى ەلىمىزدە وتەتىن ماڭىزدى وقيعالار تۋرالى ايتتى.