وليگارحتار يەلىك ەتەتىن 12 كومپانياعا دا اتالمىش سانكسيالاردىڭ قاتىسى بار، دەپ حابارلايدى Baq.kz اقپارات اگەنتتىگى CNN باسىلىمىنا سىلتەمە جاساپ.
قارجى مينيسترلىگى جاريالاعان شەشىمدەردىڭ سونداي-اق جوعارعى شەندى رەسەي ۇكىمەتىنىڭ 17 شەنەۋنىگى مەن مەملەكەتتىك «روسوبورونەكسپورت» كومپانياسىنا قاتىسى بار. اتالمىش كومپانيا «رەسەي قارجى كورپوراتسياسىمەن» بىرگە سيرياعا قاتىستى ارەكەتتەر جاسادى دەپ ايىپتالىپ وتىر.
ترامپ اكىمشىلىگى رەسەي وليگارحتارى مەن شەنەۋنىكتەرىنە سانكتسيا جاريالاۋ ارقىلى 2016-جىلى ا ق ش پرەزيدەنتى سايلاۋىنا پۋتيننىڭ ارالاسقانىن دالەلدەگىسى كەلەدى. سونداي-اق رەسەيدى قىرىم، ۋكراينا، سيريا جەرىندەگى قاقتىعىستارعا ارالاستى دەپ ايىپتاپ وتىر. كرەملدىڭ باسشىلىعىمەن رەسەي وليگارحتارى 2016، 2017-جىلعى باتىس ەلدەرىندەگى دەموكراتيالىق سايلاۋلارعا ارالاسقانى ءۇشىن جازالانۋى ءتيىس دەيدى اق ءۇي وكىلدەرى.
«ەلدى شاتاستىرىپ، پىكىرتالاس پەن زۇلىمدىق تۋدىرىپ وتىرعان ادامدار جازالانۋى ءتيىس» دەدى پرەزيدەنت دونالد ترامپ.
ال قارجى ءمينيسترى ستيۆەن منۋچين قىرىم جانە سيرياداعى قاقتىعىستارعا رەسەي قارۋ-جاراق جولدادى دەيدى.
اق ءۇي اكىمشىلىگىنىڭ وكىلى جۋرناليستەرگە: «اتالمىش سانكسيالار الەمدە بولىپ جاتقان وقيعالارعا رەسەي ۇكىمەتىنىڭ جاۋىزدىقپەن ارالاسۋىنا تىيىم سالۋ ءۇشىن جاۋاپ رەتىندە جاسالدى» دەپ مالىمدەدى.
ا ق ش قاھارىنا ىلىككەن 7 وليگارح قاتارىندا ءپۋتيننىڭ تۋعان كۇيەۋبالاسى ەنەرگەتيكا بويىنشا اتقارۋشى ديرەكتور كيريلل شامالوۆ تا بار. ودان وزگە فرانسياعا ميلليون ەۋرونى شابادانمەن تاسىدى دەپ ايىپتالعان سۇلەيمان كەريموۆ، ترامپ سايلاۋالدى كامپانياسىنىڭ بۇرىنعى ءتوراعاسى پول مانافورتپەن دوس بولعان ميللياردەر ولەگ دەريپاسكا بار.
ا ق ش ۋلانعان سكريپالدار ىسىنەن سوڭ الدىمەن 100 رەسەي ەلشىسى مەن ارنايى قىزمەت وكىلدەرىن ەلدەن قۋعان سوڭ، رەسەي دە 60 امەريكالىق ديپلوماتتى شىعارىپ سالعان بولاتىن. وسى اۋىر وقيعالاردان سوڭ، وليگارحتارعا قارسى سانكسيالار جاريالاندى.
ياعني، پۋتين سيريا پرەزيدەنتى باشار اسادتى ۇنەمى قولداعانى ءۇشىن، 2016-جىلى ا ق ش جانە ەۋروپا ەلدەرىندەگى سايلاۋدا دەموكراتياعا نۇقسان كەلتىرگەنى ءۇشىن، گرۋزيا مەن ۋكراينا جەرىندەگى قاندى قاقتىعىستارعا تۇرتكى بولعانى ءۇشىن ترامپتىڭ اشۋ-ىزاسىنا تيگەن. ا ق ش ۇلتتىق قاۋىپسىزدىك كوميتەتىنىڭ باسشىسى ح. ر. ماكماستەر سەيسەنبى كۇنى زەينەتكە شىعىپ بارا جاتىپ، سوڭعى رەت سويلەگەن سوزىندە رەسەيدى بۇدان دا قاتتى جازالاۋ قاجەت دەپ سۇحبات بەردى. ول: «ترامپ رەسەيمەن جاقسى قارىم-قاتىناس قۇرۋ كەرەكتىگىن ۇنەمى ايتادى، الايدا كونگرەسس پەن اكىمشىلىك پرەزيدەنتتى قولدامايدى، كرەملگە جىلى قاباق تانىتۋدىڭ قاجەتى جوق» دەدى.
ايتا كەتەرلىگى، بۇگىنگى كۇنگە دەيىن اق ءۇي 189 رەسەي ازاماتىن ءار ءتۇرلى باعدارلاماعا سايكەس سانكسيالاعان. قاڭتاردا 200 باقۋات رەسەي ازاماتى مەن شەنەۋنىگى يدەنتيفيكاتسيالاندى. ال ناۋرىزدا رەسەي ۇكىمەتىنىڭ حاكەرلەرى مەن تىڭشى اگەنتتەرىنە فبر ديرەكتورى روبەرت ميۋللەر سانكسيا جاريالاعان بولاتىن.
رەسەي سىرتقى ىستەر مينيسترلىگى سانكتسيالارعا قاتىستى قاتاڭ تۇردە جاۋاپ بەرەتىندەرىن ايتتى. «ۆاشينگتون رەسەي ازاماتتارىنا امەريكالىق ۆيزا بەرمەي، بيزنەسمەندەردىڭ قارجى اكتيۆتەرىن «قاتىرىپ»، كەدەرگى كەلتىرۋدە. الايدا، ءبىز ۆاشينگتونعا سانكسيا تىلىندە سويلەۋدى دوعارۋىن سۇرايمىز. بۇل رەسەي-امەريكالىق قارىم-قاتىناسقا كەزەكتى نۇقسان كەلتىرۋ ارەكەتى عانا» دەيدى مينيسترلىك وكىلدەرى.