بۇل باج سالىعى ۆاشينگتون 3- ساۋىردە 25 پايىزدىق باج سالىعى سالىنادى دەگەن قىتايدان يمپورتتالاتىن 50 ميلليارد دوللاردىڭ تاۋارىنا قوسىمشا ەنگىزىلۋى مۇمكىن.
بەيجىڭ بۇعان دەيىن ا ق ش- تىڭ قىتايدان يمپورتتالاتىن 50 ميلليارد دوللاردىڭ تاۋىران باج سالىعىن سالۋ شەشىمىنە جاۋاپ رەتىندە ا ق ش- تان يمپورتتايتىن 50 ميلليارد دوللاردىڭ تاۋارىنا باج سالىعىن ەنگىزگەن. قىتاي نەگىزىنەن ا ق ش- تاعى پرەزيدەنت سايلاۋىندا تۇرعىندارىنىڭ كوبى ترامپقا داۋىس بەرگەن شتاتتاردىڭ اۋىل شارۋاشىلىعى ونىمدەرىنە باج سالىعىن ەنگىزىپ وتىر.
ترامپ قىتايدىڭ بۇل ارەكەتىن «ادىلەتسىز جاۋاپ» دەپ باعالاپ، ونى قوسىمشا ساۋدا تاريفتەرىن ەنگىزۋگە تۇرتكى دەپ اتادى. اق ءۇيدىڭ مالىمدەۋىنشە، ا ق ش العاشقى شەشىمىن فاكتىلەردى مۇقيات تالداپ بارىپ قابىلداعان، ال قىتايدىڭ ارەكەتى «نەگىزسىز» بولعان.
ا ق ش- تىڭ قىتايعا قارسى العاشقى قادامى امەريكالىق قور بيرجالارىندا اكسيا باعامدارىنىڭ تومەندەۋىنە ىقپال ەتتى. بۇدان سوڭ پرەزيدەنت اكىمشىلىگىنىڭ بىرنەشە مۇشەسى باج سالىعىن ەنگىزۋ ا ق ش تاۋارلارىنىڭ قىتاي نارىعىنا ەنۋىنە جول اشۋ جانە امەريكالىق ينتەللەكتۋالدىق مەنشىكتى قورعاۋ جونىندەگى كەلىسسوزگە دالەل عانا بولاتىنىن مالىمدەدى. كەلىسسوزدەن ناتيجە شىقپاسا باج سالىعى ەنگىزىلمەيدى.
ساراپشىلاردىڭ پىكىرىنشە، بەيجڭنىڭ جاۋابى مەن ترامپتىڭ وعان رەاكتسياسى ەكى ەل اراسىندا ساۋدا سوعىسى ءجۇرۋى ىقتيمالدىعىن ارتتىرادى. نيۋ-يورك قور بيرجاسىندا 5- ءساۋىر كۇنى كەشكە فيۋچەرس باعامدارى كۇرت ءتۇسىپ كەتتى.
«ازاتتىق»