قىتاي ش ى ۇ ەلدەرى جۋرناليستەرى ءۇشىن ءۇش ايلىق باسپا ءسوز تۋرىن وتكىزەدى

بەيجىڭ. قازاقپارات - شاڭحاي ىنتىماقتاستىق ۇيىمىنا (ش ى ۇ) مۇشە ەلدەردىڭ جۋرناليستەرى ءۇشىن قىتاي ءۇش ايلىق تۋردى باستادى، دەپ حابارلايدى وسى ەلدەگى «قازاقپارات» ح ا ا مەنشىكتى ءتىلشىسى.

بۇل تارتىمدى شارانى وتكىزۋ تۋرالى قىتاي جاريا ديپلوماتياسى قاۋىمداستىعى مەن بەيجىڭ شەت تىلدەرى ۋنيۆەرسيتەتى جانە قىتاي حالىقارالىق باسپا ءسوز ورتالىعى جانىنداعى ش ى ۇ باسپا ءسوز ورتالىعى باستاما كوتەردى.

قازاقستان، قىرعىزستان، تاجىكستان، وزبەكستان جانە بەلارۋس ەلدەرىنەن كەلگەن 12 جۋرناليست قىتايدىڭ مادەنيەتىمەن جانە داستۇرىمەن، سونداي-اق ەل وڭىرلەرىنىڭ دامۋىمەن تانىسادى. ق ح ر عالىمدارىمەن، جۋرناليستەرى جانە ساياساتكەرلەرىمەن كەزدەسۋلەر وتكىزەدى.

باسپا ءسوز تۋرىنىڭ اشىلۋ راسىمىندە ءسوز العان ق ح ر س ءى م اقپارات جانە باسپا دەپارتامەنتى ديرەكتورىنىڭ ورىنباسارى لي مينگاننىڭ ايتۋىنشا، قاتىسۋشىلار قىتايدىڭ بەس مىڭ جىلدىق تاريحىمەن عانا ەمەس، ق ح ر جاڭا جەتىستىكتەرىمەن: جوعارى جىلدامدىقتى تەمىرجولدارمەن، قىتايلىق ەلەكتروندىق تولەم جانە ينتەرنەت- ساتىلىم جۇيەسىمەن تانىساتىن بولادى.

سونداي-اق باسپا ءسوز تۋرىنىڭ اشىلۋىندا قىتاي جاريا ديپلوماتياسى قاۋىمداستىعىنىڭ ءتوراعاسى گۋڭ جياڭجۋن، بەيجىڭ شەت تىلدەرى ۋنيۆەرسيتەتىنىڭ پرورەكتورى سۋن يۋجۋن جانە قىتايداعى «قازاقپارات» ح ا ا مەنشىكتى ءتىلشىسى ءسوز سويلەدى.

ەسكە سالا كەتسەك، ش ى ۇ- عا مۇشە ەلدەر باسشىلارىنىڭ 18 -سامميتى 2018 -جىلى ماۋسىمنىڭ باسىندا شىعىس قىتايلىق شاندۋن پروۆينسياسىنداعى چيڭداۋ قالاسىندا وتەدى.