ءال-فارابي اۋداندىق سوتى «ورداباسىنىڭ» بۇرىنعى ويىنشىسىن 3 جىلعا باس بوستاندىعىنان ايىردى، دەپ حابارلايدى قازاقپارات ءتىلشىسى.
سوت وتىرىسى كەزىندە ەلدار باقتىعاليەۆتىڭ 11 ادامدى الداعانى جانە جابىرلەنۋشىلەردەن 1,5 ميلليون تەڭگەگە دەيىن اقشا العانى تولىعىمەن دالەلىن تاپقان. وبلىستىق سوتتىڭ مالىمەتىنشە، ايىپتالۋشى قازىعۇرت، ورداباسى، سايرام، شاردارا، وتىرار جانە سوزاق اۋداندارى اكىمدەرى مەن «ورداباسى» ف ك پرەزيدەنتىنىڭ، «ورتالىق سۋ سپورتى كەشەنى» مەن «قىران» فۋتبول كلۋبى، سونداي-اق ءشامشى قالداياقوۆ اتىنداعى وبلىستىق فيلارمونيا ديرەكتورلارىنىڭ قابىلداۋ بولىمدەرىنە حابارلاسقان.
ءسويتىپ ءوزىن وبلىستىق اكىمدىكتىڭ قىزمەتكەرىمىن دەپ، قايىرىمدىلىق ماقساتتا 1 ميلليون تەڭگەدەن اسا قاراجات سۇراعان. اكىمدەر مەن مەكەمە باسشىلارىنىڭ سەنىمىنە كىرىپ، اقشالاردى بانك كارتوچكالارىنا اۋدارتىپ الىپتى. كەيىننەن سۇراستىرا كەلە اۋدان باسشىلارى ونىڭ الاياق ەكەنىن ءبىلىپ قالىپ، قۇزىرلى ورگاندارعا ارىزدانعان. كەيىننەن بۇرىنعى فۋتبولشىنىڭ ۇستىنەن قىلمىستىق كودەكستىڭ 190 بابى 2-3 بولىگى 1-2 -تارماقتارى («الاياقتىق») جانە 24 -بابىنىڭ 3 -بولىگى («قىلمىسقا دايىندالۋ جانە قىلمىسقا وقتالۋ») بويىنشا ءىس قوزعالعان بولاتىن. سوت تالقىلاۋ كەزىندە ول ءوز كىناسىن مويىنداپ، ءتىپتى جابىرلەنۋشىلەرگە كەلتىرىلگەن شىعىن كولەمىن ءىشىنارا تولەدى. سوعان قاراماستان سوت قاراعاندى وبلىسىنىڭ تۋماسىنا جازاسىن تەمىر توردا وتەۋ تۋرالى ۇكىم كەستى. ەندى فۋتبولشى ءۇش جىل ءومىرىن ورتا دارەجەدەگى تۇزەۋ مەكەمەسىندە وتەيتىن بولادى.