ەكى ەل شەكارا قىزمەتىنىڭ مالىمەتىنشە، جارالانعانداردىڭ جاعدايى ءبىرقالىپتى. باتكەن وبلىسىنداعى قىرعىز-تاجىك شەكاراسىنداعى جانجالعا ۋچ-دوبو اۋىلى تۇرعىنىنىڭ جەرىنە قورشاۋ ورناتۋى سەبەپ بولعان. بۇل ايماقتىڭ ءالى قاي مەملەكەتكە تيەسىلى ەكەنى رەسمي انىقتالماعاندىقتان، اتالعان جەرگە كەز-كەلگەن شارۋاشىلىق جۇمىستارىن جۇرگىزۋگە تىيىم سالىنعان.
«قىرعىزستان ازاماتى ەسكەرتۋگە قۇلاق اسپاعان. بۇل تاجىكستاننىڭ حوجا-الو اۋىلى تۇرعىندارىنىڭ اشۋىن تۋعىزعان. ەكى تاراپتان 50 شاقتى ادام سوزگە كەلىپ، سوڭى ءبىر-بىرلەرىنە تاس لاقتىرۋعا دەيىن بارعان» دەپ حابارلايدى قىرعىزستان جانە تاجىكستاننىڭ شەكارا قىزمەتى.
جانجال جارتى ساعاتتان كەيىن توقتاعان. جەرگىلىكتى بيلىك وكىلدەرى اۋىل تۇرعىندارىمەن كەزدەسكەن.
الەۋمەتتىك جەلىدە جانجالدىڭ بەينە جازباسى پايدا بولدى. ول جەردە تاراپتاردىڭ ءبىر-بىرىنە تاس لاقتىرىپ جاتقانىن كورۋگە بولادى.
قىرعىزستان مەن تاجىكستان اراسىنداعى مەملەكەتتىك شەكارانىڭ ۇزىندىعى 971 شاقىرىمدى قۇرايدى. ونىڭ 519 شاقىرىمى قاي ەلگە جاتاتىنى ءالى ناقتىلانباعان. ەكى ەل شەكاراسىندا 70 كە جۋىق داۋلى ۋچاسكە بار.