قان قۇيۋ سالاسىندا قازاقستان فرانسيادان وزدى

استانا. قازاقپارات - حالىقارالىق قان قۇيۋ قوعامىنىڭ پرەزيدەنتى ريەۆي رەددي قازاقستاندا ترانسفۋزيولوگيانىڭ دامۋىنا ءوزىنىڭ ساراپشىلىق باعالاۋىن بەردى، دەپ حابارلايدى قازاقپارات.

«مەديتسينا سالاسىندا قازاقستاننىڭ ەكى جەتىستىگىنە زور قۇرمەتپەن قارايمىن، ياعني پوستكەڭەستىك كەڭىستىكتە العاش رەت ينفەكتسيا سكرينينگىنىڭ اۆتوماتتاندىرىلعان ەكى دەڭگەيلى جۇيەسى ەنگىزىلدى. بۇل جۇيە وتە بىرەگەي ءارى پاتوگەندەردى انىقتاۋعا كومەكتەسەدى»، - دەدى ول استاناداعى «قاننىڭ وتەۋسىز ەرىكتى دونورلىعىن دامىتۋدىڭ وزەكتى ماسەلەلەرى» اتتى 3-ەۋرازيالىق كونگرەستە.

سونىمەن قاتار رەددي ەلىمىزدىڭ ەكىنشى جەتىستىگى رەتىندە وتاندىق قان قىزمەتىنىڭ جۇمىسىن اتاپ ءوتتى. بۇل رەتتە جوعارى ساپادا قان كومپونەنتتەرىن ءبولۋ پروتسەسىنە قاتىستى جاڭا تەحنولوگيالاردىڭ ورنى ەرەكشە بولىپ وتىر.

«قازاقستان پاتوگەن-رەدۋتسەنتتەرىن بەرۋدى ەنگىزگەن ءۇشىنشى ەل، سىزدەرگە دەيىن شۆەيتساريا مەن بەلگيا بولدى. سودان كەيىن وسى كلۋبقا فرانسيا قوسىلدى. بۇل ءوز كەزەگىندە ماڭىزدى، سەبەبى جوعارى ساپاداعى قان كومپونەنتتەرىنە ءزارۋ ناۋقاستار كوپتەپ كەزدەسەدى»، - دەدى حالىقارالىق ساراپشى.

سونىمەن قاتار ر. رەددي قازاقستانعا العاش كەلىپ وتىرعانىن ايتا كەلە، دونورلىقتى دامىتۋ بارشا الەم ءۇشىن وزەكتى تاقىرىپ ەكەنىن جەتكىزدى.

«دەنساۋلىق جاعدايى جاقسى بارلىق ادامدار قان تاپسىرۋى كەرەك. سەبەبى ناۋقاستار وسىنداي كومەككە مۇقتاج»، - دەدى ISBT باسشىسى.

ترانسفۋزيولوگتار كونگرەسى استانادا 4-7- ءساۋىر ارالىعىندا وتەدى. بۇل شاراعا قاتىسۋ ءۇشىن قازاقستانعا حالىقارالىق ۇيىمداردىڭ وكىلدەرى، ۇلى بريتانيا، يسپانيا، ا ق ش، گەرمانيا، جاپونيا جانە رەسەيدىڭ الدىڭعى قاتارلى ترانسفۋزيولوگتارى كەلدى.

اۆتور: رۋسلان عابباسوۆ