بۇل تۋرالى قازاقپارات تىلشىسىنە ش ق و ءوڭىرارالىق گەولوگيا جانە جەر قويناۋىن پايدالانۋ دەپارتامەنتىنىڭ باسشىسى سەرىك كەلەمانوۆ ايتىپ بەردى.
سوڭعى ءۇش جىلدا شىعىستىڭ مينەرالدىق- شيكىزات كەشەنىن دامىتۋعا 5,5 ميلليارد تەڭگە بولىنگەن ەكەن. ول قارجىعا كەڭەس زامانىندا تولىق بارلانباعان اۋماقتار: سەمەي قالاسىنىڭ ماڭايى، كۇرشىم، اباي، اياگوز اۋداندارى، تارباعاتاي تاۋ سىلەمدەرى تىڭعىلىقتى زەرتتەلىپتى. بۇل بارلاۋ جۇمىستارى شىعىستا دا قويناۋى تولىق زەرتتتەلمەگەن اۋماقتار كوپ ەكەنىن دالەلدەسە كەرەك. ەندى سول كەنىشتەردىڭ قورىن ناقتىلاپ، ەكونوميكالىق تيىمدىلىگىنە كوز جەتكىزۋ ءۇشىن كەشەندى زەرتتەۋلەر جۇرگىزىلۋى ءتيىس. اسىرەسە وسكەمەننىڭ ىرگەسىندەگى احمەر كەنىشىنە گەولوگتار ۇلكەن ءۇمىت ارتىپ وتىر. ليتي اسا سيرەك كەزدەسەتىن، قولدانۋ اۋقىمى ستراتەگيالىق ماڭىزعا يە مەتالل بولعاندىقتان، گەولوگتار ونىڭ بولجامدى قورىن ايتۋدان دا باس تارتىپ وتىر.
«ادەتتە ليتي مەن قالايى ءبىر-بىرىنە ىلەسىپ جۇرەدى. مۇندا دا سولاي بوپ تۇر. ءبىزدىڭ مىندەت كەنىشتى انىقتاۋ. ونىڭ ەكونوميكالىق تيىمدىلىگىن وزگە ماماندار زەرتتەۋى ءتيىس. وبلىس بويىنشا قالايى مەن ءليتيدىڭ كەنىشى اسۋبۇلاق كەنىشتەر توبىنىڭ كەيبىر بولىكتەرىندە عانا كەزدەسەدى. سوندىقتان احمەر ۋچاسكەسىن يگەرۋگە نيەتتى ينۆەستورلار تابىلادى دەپ ويلايمىز» - دەيدى سەرىك كەلەمانوۆ.
دەپارتامەنت وكىلى پولينا سكرەبتسوۆانىڭ ايتۋىنشا، ليتي مەتالى جىلۋ ۇنەمدەگىش شىنىلاردىڭ قۇرامىندا 31 پايىزعا دەيىن، ەلەكتروموبيل باتارەيالارىنىڭ قۇرامىندا 23 پايىزعا دەيىن كەزدەسەدى. وعان كەيبىر عالىمدار «بولاشاقتىڭ مۇنايى» دەگەن باعا دا بەرىپ ۇلگەرىپتى. قۇنى ۋراننان ارزان بولعاندىقتان، يادرولىق رەاكسيالارعا وتىن رەتىندە پايدالانۋ جولدارى زەرتتەلىپ جاتسا كەرەك. ياعني، ۋاقىت وتكەن سايىن ليتيگە دەگەن سۇرانىس تا ارتا بەرمەك.
جالپى شىعىستىڭ گەولوگيالىق كارتاسىنا 283 جەر قويناۋىن پايدالانۋ نىسانى تىركەلگەن.