«پرەزيدەنت مۋن چجە ين ورتالىق ازيانىڭ كەيبىر ەلدەرىنە (سونىڭ ىشىندە قازاقستانعا) بارۋدى جوسپارلاعان. ءبىراق قازىر ەكى كورەيا اراسىندا سامميت وتكىزىلۋىنە، سونداي-اق ك ح د ر مەن ا ق ش اراسىنداعى سامميتكە بايلانىستى ساپار كەيىنگە قالدىرىلىپ جاتىر. دەگەنمەن پرەزيدەنت وسى ساپارعا شىعىپ، كورەيا رەسپۋبليكاسى مەن قازاقستان اراسىنداعى ىنتىماقتاستىق ماسەلەلەرىن تالقىلايدى دەپ سەنەمىن. ءتىپتى سول كەلىسسوزدەر ناتيجەسىندە ىنتىماقتاستىقتىڭ جول كارتاسى دا جاسالادى دەگەن ويدامىن»، - دەيدى كورەيا رەسپۋبليكاسى پرەزيدەنتى جانىنداعى سولتۇستىك باعىتتاعى ەكونوميكالىق ىنتىماقتاستىق كوميتەتىنىڭ ءتوراعاسى سون ەن گيل.
سون ەن گيل بەلگىلى ءبىر ەلدەرمەن ىنتىماقتاستىقتى دامىتۋ ءۇشىن ارنايى قۇرىلعان جاڭا كوميتەتتىڭ قىزمەتى جانە قازىرگى پرەزيدەنتتىڭ «جاڭا سولتۇستىك ساياساتى» تۋرالى ايتىپ بەردى.
«كورەيا رەسپۋبليكاسىنىڭ جاڭا سولتۇستىك ساياساتى - مۋن چجە ين ۇكىمەتىنىڭ كورەيانىڭ ەۋروپاعا شىعۋىنا جول اشاتىن جاڭا ەكونوميكالىق كارتا جاساۋدى ماقسات ەتەتىن ساياساتى. ول رەسەي، قىتاي، موڭعوليا جانە ورتالىق ازيا ەلدەرىن قامتيدى. كورەيا رەسپۋبليكاسىنىڭ ورتالىق ازياعا، رەسەي جانە موڭعولياعا جول اشۋى جىبەك جولىن قايتا جاڭعىرتىپ، جالپى دامۋ جولىنا ءتۇسۋى دەۋگە بولادى»، - دەدى ول.
كوميتەت باسشىسى قازاقستانمەن مادەني بايلانىستارعا توقتالدى. ول قازاقستاندى كورەيانىڭ ماڭىزدى ارىپتەسى دەپ اتاپ، «جاڭا سولتۇستىك ساياساتتى» ىسكە اسىرۋداعى ەرەكشە ءرولىن اتاپ كورسەتتى.
«قازاقستانمەن مادەنيەت سالاسىندا كوپتەگەن ورتاق تۇستارىمىز بار. قازاقستاندا 100 دەن استام كورەي تۇبەگىنىڭ تۋماسى ءومىر سۇرەدى. قازاقستانمەن ىنتىماقتاستىقتى دامىتۋدا وراسان الەۋەت بار. مەملەكەتتەرىمىز اراسىندا تەمىرجول جانە اۋە جولى قاتىناسىن جانداندىرۋ قاجەت دەپ سانايمىن. قازىر كوميتەت «جاڭا سولتۇستىك ساياساتتىڭ» جول كارتاسىن جاساۋمەن اينالىسىپ جاتىر. كەلەسى ايدا پرەزيدەنتكە ونىڭ دايىن ەكەنىن حابارلاۋدى جوسپارلاپ وتىرمىز»، - دەدى كوميتەت باسشىسى «قازاقپارات» ح ا ا تىلشىسىنە بەرگەن سۇحباتىندا.