شەت ەلدە تۇراتىن قازاق بالالارىنىڭ ءبىلىم الۋىنا تەگىن گرانتتار بەرىلەدى
دەپ حابارلايدى Baq.kz اقپارات اگەنتتىگى.
بۇل جولعى ءبىلىم گرانتتارىن رەسەي وقۋ ورىندارى ءبولىپ وتىر. ازىرگە انىعى 10 مىڭ گرانت. قىرعىزستان مەن وزبەكستاندا تۇراتىن قانداستارىمىزدىڭ وقۋشىلارىنا دەپ جوسپارلانعان گرانتتار 2018-2019 وقۋ جىلىنا ارنالعان.
قول قويۋ راسىمىنە قاتىسقان دۇنيەءجۇزى قازاقتار قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ مۇنداي ءبىلىم سالاسىنداعى كەلىسىم- شارت العاش رەت جاسالىپ وتىرعانىن ايتادى.
«ءبىز جاقىندا قانداستارىمىز تۇراتىن نەگىزگى مەملەكەتتەردى ارالاپ شىقتىق. رەسەيدە، وزبەكستان مەن قىتايدا، موڭعوليادا بولدىق. قازىرگى كەزدە شەتتە تۇراتىن قانداستارىمىزدىڭ بالالارى تۇگەلگە جۋىق سول وزدەرى تۇرىپ جاتقان ەلدىڭ تىلىندە سويلەپ، وقىپ جاتىر. ەلباسىنىڭ الاڭداۋشىلىق ءبىلدىرىپ وتىرعانى دا وسى ماسەلە. سوعان وراي تاپسىرما دا بەرگەن. سول بويىنشا ءتۇرلى شارالار قولدانىلىپ جاتىر. بالالاردىڭ قازاق ءتىلىن يگەرىپ، قازاقتىڭ رۋحاني بولمىسىن مەڭگەرىپ شىعۋى ءبىزدىڭ ۇلت رەتىندەگى ماڭىزدى ماسەلەلەرىمىزدىڭ ءبىرى. وسى تۇرعىدان العاندا، شەتتەگى قازاقتارىمىزدىڭ ىشىندە دە نەشە ءتۇرلى دارىندى بالالار بار. سولاردى ەلگە اكەلۋىمىز كەرەك. ولاردى ەلىمىزدەگى الدىنعى قاتارلى ۋنيۆەرسيتەتتەردە وقىتۋىمىز كەرەك. ال ودان بولەك، قازىر عانا قول قويعان مەموراندۋم ارقىلى شەت ەلدەردە دە وقۋىنا مۇمكىندىك جاساۋىمىز كەرەك. وسى بويىنشا «بولاشاق» حالىقارالىق باعدارلامالار ورتالىعى ءبىلىم سالاسى بويىنشا بىزبەن العاشقى بولىپ كەلىسىم- شارت جاساسىپ وتىر» - دەيدى زاۋىتبەك تۇرىسبەكوۆ.
«ءبىزدىڭ باستى ماقساتىمىز - شەتتەگى قانداستارىمىزدىڭ دا قازاقستاندىق جاستارمەن بىردەي ءبىلىم الۋىن، ولاردىڭ دا سول ءبىلىم العان جەرلەرىندە قازاقى مادەنيەتتى، ۇلتتىق بولمىسىمىزدى ناسيحاتتاۋىنا مۇمكىندىك جاساۋ» - دەگەن حالىقارالىق باعدارلامالار ورتالىعىنىڭ ديرەكتورى جانبولات مەلدەشيەۆ شەتەلدەگى قانداستارىمىزدىڭ ءبىلىم گرانتتارىن قالاي يگەرۋىنە بولاتىنىن ءتۇسىندىردى.
«ءبىزدىڭ ورتالىقتىڭ ىستەپ جاتقان جۇمىسىنىڭ بارلىعى دا قازاقستاندىق جاستارعا دا، شەتتە تۇراتىن قانداستارىمىزعا دا ورتاق، بارىنە بىردەي ءتۇسىندىرۋ جاسايمىز. مىسالى رەسەيدە، فرانسيادا، انگليادا تەگىن ءبىلىم الۋ مۇمكىندىكتەرى وتە كوپ. ءتىپتى، قىتايدا دا مۇنداي مۇمكىندىكتەر جەتىپ ارتىلادى. الداعى اپتادا، قۇداي قالاسا، يتالياعا، يسپانياعا بارامىز دەپ جوسپارلاپ وتىرمىز. ول جاقتا دا تەگىن ءبىلىم مۇمكىندىگى جوعارى. وسىنىڭ بارلىعىن ءبىز تەك قانا قازاقستاندىق ستۋدەنتتەرگە ەمەس، دۇنيەءجۇزى قازاقتار قاۋىمداستىعىنىڭ سۇرانىسىمەن، سول ەلدەردە جانە باسقا دا ەلدەردە تۇرىپ جاتقان قانداستارىمىزعا دا قولجەتىمدى، ولارعا دا شەتەلدە وقۋ مۇمكىندىگىن تۋدىرۋ ءۇشىن جاساپ وتىرمىز» - دەيدى جانبولات مەلدەشوۆ.
ونىڭ ايتۋىنا قاراعاندا بۇل جولعى رەسەيدەن كەلەتىن 10 مىڭ گرانتتىڭ «بولاشاق» باعدارلاماسىنا ەش قاتىسى جوق. بۇل حالىقارالىق باعدارلامالار ورتالىعىنىڭ جۇمىس باعدارلاماسىنىڭ ءبىر تارماعى عانا. سونىمەن قاتار، جانبولات مەلدەشوۆ بۇل گرانتتاردى يەلەنۋ ءۇشىن قانداي تالاپ قويىلاتىنىن ءتۇسىندىردى.
«بولاشاق» باعدارلاماسى قازاقستاندىق جاستارعا عانا ارنالعان. ال ودان بولەك ءبىزدىڭ ورتالىق شەتەلدەن گرانتتار اكەلۋدى دە قولعا العان. مىسالى ح ب و ءتورت باعىتتا جۇمىس ىستەيدى. ءبىرى - «بولاشاق» جاڭاعى ايتقان، ەكىنشىسى - «سەرپىن» باعدارلاماسى، ءۇشىنشىسى - شەتەلدەگى ستۋدەنتتەردى قازاقستانعا اكەپ وقىتۋ جانە ءتورتىنشىسى - شەتەلدىك گرانتتاردى قازاقستانعا تارتۋ. ءبىز د ق ق- مەن بىرلەسىپ سوڭعى ەكى باعىتتى جۇزەگە اسىرماقشىمىز. ياعني شەتەلدەن گرانتتار تارتۋ مەن شەتتەگى قانداستارىمىزدى قازاقستاندا وقىتۋ. بۇل جولعى گرانتتاردى يگەرۋ ءۇشىن ءبىزدىڭ تاراپىمىزدان ەشقانداي تالاپ قويىلمايدى. تەك سول گرانت ءبولىپ وتىرعان ۋنيۆەرسيتەتتىڭ وزىندىك ەرەجەلەرى بار. سول تالاپقا ساي بولسا بولدى. نەگىزىنەن، ەڭ باستى تالاپ - اتيتاتتىڭ ورتاشا باللى جانە شەت ءتىلىن ءبىلۋ تۋرالى سەرتيفيكات. سەرتيفيكاتتىڭ ءوزى كەيبىر ۋنيۆەرسيتەتتە مىندەتتى ەمەس. ءبىر جىل تەگىن تىلدىك كۋرس وتكىزىلەدى، ودان كەيىن، ۋنيۆەرسيتەتتە وقيتىن بولادى. تەك بالادا وقيمىن دەگەن تالپىنىس بولسا بولدى» - دەيدى ول.
ح ب و- نىڭ قانداستارعا تارتىپ وتىرعان گرانتتارى قازاقستاننىڭ وقۋ ستاندارتىنداعى قانداستارعا بولىنگەن 4 پايىزدىق مەملەكەتتىك گرانتتان تىس.
وسى ورايدا، جانبولات مەلدەشوۆ تاعى ءبىر ءتيىمدى اقپاراتپەن ءبولىستى.
«جاقىندا ءبىزدىڭ ءبىلىم جانە عىلىم ءمينيسترى ەرلان ساعاديەۆ ا ق ش- قا بارىپ كەلدى. سول جەردە USID- تىڭ ارنايى اۋعانستانعا ارنالعان باعدارلاماسى بار ەكەن. سول باعدارلاما بويىنشا، ەگەر قازاقستان اۋعانستاندىق جاستاردى قازاقستانعا اكەپ وقىتاتىن بولسا، وقۋ اقىسىن ا ق ش تولەيدى. بۇل جۇيە تەك اۋعانستان ازاماتتارىنا ارنالعان. جالپى مۇنداي باعدارلامالار، ساپالى ءبىلىم الۋعا مۇمكىندىك بەرەتىن جوبالار الەمدە وتە كوپ. سولاردى ەلىمىزگە اكەپ، حالىققا ءتۇسىندىرۋ جۇمىستارىن جۇرگىزۋ كەرەك» - دەيدى جانبولات مەلدەشوۆ.
ونىڭ ايتۋىنا قاراعاندا، تەگىن ءبىلىم الۋعا ىنتا بولسا، الەمنىڭ كوپتەگەن ەلىنەن تەگىن گرانتتار تابۋعا بولادى.
«مىسالى اۋستريا، دانيا، شۆەتسيا، چەحيا ت. ب. قاتارلى ەۋروپالىق ەلدەردە جالپى ۋنيۆەرسيتەتتەگى ءبىلىم تەگىن. ونىڭ سىرتىندا ءبىرشاما الەۋمەتتىك جەڭىلدىكتەر دە قاراستىرىلعان. مىسالى، جول ءجۇرۋ بيلەتىن، ارزانداتىلعان دەنساۋلىق ساقتاۋ پوليۋسى ت. ب. ال بۇل ەلدەردە وقىعىسى كەلەتىن قازاقستاندىق جاستارعا نەگىزگى ءتۇسىندىرۋ جۇمىستارى جۇرگىزىلىپ جاتىر. ەندى ءبىز دقق- مەن بىرلەسىپ، شەتتە تۇراتىن قانداستارىمىزدى دا وسى تەگىن ءبىلىمدى قالاي يگەرۋ كەرەكتىگىنە، وعان قانداي قۇجات، قانداي تالاپتار قويىلاتىنىن تۇسىندىرمەكپىز. ەگەر بۇل باستامامىز ىسكە اسىپ كەتسە، شەتتەگى قانداستارىمىزعا وتە ۇلكەن كومەك بولادى دەپ ويلايمىن» - دەيدى «بولاشاق» باسشىسى.
سونىمەن قاتار، جانبولات مەلدەشوۆ بيىلعى جىلعى شەتەلدىك گرانتقا (رەسەيدەن كەلگەن 10 مىڭ گرانت) قۇجات قابىلداۋ، سىناۋ وتكىزۋ شىمكەنتتە وتەتىنىن ايتتى.
«نەگىزىنەن قىرعىزستان مەن وزبەكستانداعى قانداستارىمىز ءۇشىن دەپ وتىرمىز. ءبىراق، كەز كەلگەن ەلدەگى قانداستارىمىز كەلىپ قاتىسۋىنا بولادى. ءساۋىردىڭ ورتاسىندا وتەتىن سىناۋ باسەكەسى شىمكەنتتە وتەدى. ەگەر سۇرانىس ارتىپ، بالا سانى كوبەيەتىن بولسا، بيىلدان كەيىن گرانت بولگەن ۋنيۆەرسيتەتتىڭ ءوزىن سول شەت ەلدەگى قانداستاردىڭ ورتاسىنا اپارىپ، سول جەردەن سىناتىپ الۋدى ۇيىمداستىراتىن بولامىز» - دەيدى جانبولات مەلدەشوۆ.
ەرجان جاۋباي
Baq.kz