بۇگىندە شەبەردىڭ قولىنان شىققان قازاقى ناقىشتاعى بۇيىمدار شەتەلدىكتەردىڭ دە قىزىعۋشىلىعىن ارتتىرۋدا، دەپ حابارلايدى قازاقپارات.
ساكەن نازارحان 1964-جىلى 11- ساۋىردە سارجال اۋىلىندا تۋعان. مەكتەپ قابىرعاسىندا وقىپ جۇرگەن كەزىندە-اق اسقار سلياموۆ ەسىمدى ۇستازىنا ەلىكتەپ، قولونەر شەبەرى بولۋدى ارماندايدى. مەكتەپ بىتىرگەننەن كەيىن اسكەر قاتارىندا ازاماتتىق بورىشىن وتەپ كەلەدى. كەيىن سەمەيدەگى ديزاينەرلىك ۋچيليشەگە ءتۇسىپ، بالا كەزدەگى ارمانىنا قول جەتكىزەدى. ديپلوم العان سوڭ «سويۋز-مير» سۋرەتشىلەر شەبەرحاناسىنا سۋرەتشى-ديزاينەر بولىپ جۇمىسقا ورنالاسادى. جۇمىس ىستەپ ءجۇرىپ جوعارى وقۋ ورنىنا سىرتتاي ءتۇسىپ، بەينەلەۋ ونەرى فاكۋلتەتىن بىتىرەدى.
كونە ءداستۇردى جالعاستىرىپ كەلە جاتقان قولونەر شەبەرى بۇگىندە قازاقي ناقىشتارمەن ورنەكتەلگەن كيىز ءۇي جابدىقتارىن، ىدىس-اياقتار مەن ۇلتتىق ساز اسپاپتارىن، قارۋ-جاراق تۇرلەرىن جاسايدى.
«ەڭ الدىمەن اعاشتان ساندىق، دوڭگەلەك ۇستەل، بەسىك، توستاعان، تورسىق، وجاۋ سەكىلدى زاتتاردى جاسادىم. ولاردى ويۋ-ورنەكتەرمەن بەزەندىردىم. ودان كەيىن قوبىز، دومبىرا جاساۋدى قولعا الدىم. بىرتىندەپ تەرى، كيىزدەن بۇيىم جاساۋدى مەڭگەردىم. ۋاقىت وتكەن سايىن جاساعان زاتتارىما قىزىعۋشىلىق ارتىپ، سۇرانىس كوبەيدى. قازىر اعاش، سۇيەك، تەرى، مەلحيور، كۇمىس سياقتى ماتەريالداردى پايدالانىپ بارلىق بۇيىمدى قازاقى ناقىشتا جاسايمىن»، - دەيدى شەبەر.
بۇگىندە شەبەر سەمەيدىڭ تاريحي- ولكەتانۋ مۇراجايى مەن اباي مۋزەيىمەن بايلانىس ورناتقان. مۇنداعى ماقساتى - مۇراجايدا ساقتالعان ەسكى بۇيىمداردى قايتا قالپىنا كەلتىرۋ. ۇلتتىق ونەردى ناسيحاتتاپ جۇرگەن شەبەردىڭ بۇيىمدارىنا بۇگىندە سۇرانىس جوعارى. سوندىقتان تۋىندىلارىنىڭ جەكە كورمەسىن دە ءجيى ۇيىمداستىرىپ وتىرادى. جانە بۇيىمدارى «ەكسپو-2017» كورمەسىنە قاتىسىپ، قازاقتىڭ ۇلتتىق ونەرىن شەتەلدىكتەرگە تانىستىرىپ قايتقان.
شەبەردىڭ ەندىگى ارمانى - گوبەلەن ونەرىن مەڭگەرۋ. ول شي مەن ءجۇندى ورنىمەن پايدالانا وتىرىپ، جاساعان ءار زاتىنا ۇلتتىق ءار بەرگىسى كەلەتىنىن ايتادى.