قىزىلوردا قىتايمەن بىرلەسە كۇن جانە ەلەكتر ستانسالارىن سالادى

قىزىلوردا. قازاقپارات - سىر وڭىرىندە كۇن جانە ەلەكتر ستانسالارىنىڭ قۇرىلىسىن جۇرگىزۋ جوسپارلانۋدا، دەپ حابارلايدى قازاقپارات ءتىلشىسى.

قازىرگى تاڭدا وسى ماقساتتا قىتايدىڭ CNEEC مەملەكەتتىك ينجەنەرلىك كومپانياسىمەن كەلىسسوز جۇرگىزىلۋدە. وسى ارقىلى قالادا «Smart city» جوباسىن جۇزەگە اسىرۋ كوزدەلىپ وتىر.

وڭىرلىك كوممۋنيكاتسيالار قىزمەتىنىڭ حابارلاۋىنشا، بۇل كومپانيا الەمنىڭ 70 كە جۋىق ەلىندە جىلۋ، جەل جانە سۋ ەلەكتر ستانسالارىن سالعان. سونداي-اق، قوقىس وڭدەيتىن زاۋىتتار سالۋ ىسىندە دە جيناقتاعان تاجىريبەسى بار.

قىزىلوردا ءوڭىرى كۇن كوزى جونىنەن بەلسەندى ايماق ەكەنى بەلگىلى. اتاپ ايتقاندا، جاز مەزگىلىندە ونىڭ بەلسەندىلىگى ايقىن اڭعارىلادى. ول قۋاتتىلىعى جوعارى كۇن ەلەكتر ستانساسىن سالۋعا مۇمكىندىك بەرەدى. ال «اقلاق» قويماسىندا 20-25 مەگاۆاتتىق سۋ ەلەكتر ستانساسىن سالۋعا بولادى.

سىر وڭىرىندە قوقىس وڭدەيتىن زاۋىت سالۋعا دا ماڭىز بەرىلىپ وتىر. ول ايماقتا قالدىقتاردى ورتەۋ جانە ەلەكتر ەنەرگياسىنىڭ بەلگىلى مولشەرىن شىعارۋدى كوزدەيتىن ەكى مىندەتكە نەگىزدەلگەن.

سىر وڭىرىندە «Smart city» (اقىلدى قالا) جوباسىن جۇزەگە اسىرۋ ءۇشىن قىتايدىڭ الەمگە تانىمال «Huawei» كومپانياسىمەن ءوزارا ارىپتەستىك تۋرالى مەموراندۋم جاسالعان. وسى باعىتتاعى العاشقى جوبالار قىزىلوردادا سىرداريانىڭ سول جاعالاۋىنداعى جاڭا بولىگىندە مەملەكەتتىك-جەكەشەلىك ارىپتەستىك نەگىزدە قولعا الىنادى دەپ كۇتىلۋدە.