بۇل قارىم-قاتىناس فورماتىن قوس پرەزيدەنت ەكى ەلدىڭ تۇيىسكەن جەرىندە، ياعني شەكارا ماڭىنداعى ايماقتاردا تۋىنداعان ماسەلەلەردى شەشۋ ماقساتىندا ۇسىنىپ وتىر. قىرعىزستاننان كەلگەن دەلەگاتسيانى وزبەك حالقى ۇلكەن ىقىلاسپەن قارسى الدى. سەبەبىن دە تۇسىنۋگە بولادى. قانشا جەردەن كورشى بولسا دا ءوزارا ارالاسا الماي كەلگەنى بەلگىلى. ەندى جاعداي باسقاشا. شەكارالىق ايماقتار ءوزارا ىنتىماق ورناتىپ، ەكى جاقتى بايلانىسقا جان ءبىتتى. ياعني، ەندىگى جەردە ەكونوميكانى نىعايتۋعا جول اشىق دەگەن ءسوز.
«ارامىزدا شەشىمى تابىلمايتىن ماسەلە جوق. بىزگە تەك ءوزارا تۇسىنىستىك پەن سەنىم كەرەك. ءبىر-ءبىرىمىزدى تىڭداي الساق بولعانى. مىسالى، بۇعان دەيىن شەكارا ماڭىنداعى وبلىستار كەڭەسىن قۇرۋ تۋرالى ەكى ەل پرەزيدەنتىنىڭ شەشىمى شىققانى بەلگىلى. ءبىز بۇگىن سول شەشىمنىڭ ءساتتى بولعانىنا كوز جەتكىزدىك»، - دەدى وزبەكستان رەسپۋبليكاسىنىڭ پرەمەر-ءمينيسترى ابدۋللا اريپوۆ.
شەكارا ماڭىنداعى وبلىستار كەڭەسىنە وزبەك اعايىنداردان نامانگان، فەرعانا، ءاندىجان ءوڭىرىنىڭ باسشىلارى قاتىسسا، قىرعىزستان جاعىنان وش، جالال-اباد پەن باتكەن وبلىستارىنىڭ جەتەكشىلەرى جينالدى. قازىر ورتاق شەكارانى بەلگىلەۋ ماسەلەسى رەت-رەتىمەن شەشىلىپ كەلەدى. بۇل ارينە، ءوز كەزەگىندە شەكارالاس وڭىرلەردە ەكى جاقتى ساۋدانى دامىتۋعا كوبىرەك كوڭىل بولۋگە مۇمكىندىك بەرەدى.
«شەكارا ماڭىنداعى ىنتىماقتاستىق ماسەلەسى ەكى ەلدىڭ ءوزارا قارىم-قاتىناسىندا ۇلكەن ماڭىزعا يە. ويتكەنى شارۋاشىلىقتا شەشۋدى قاجەت ەتەتىن كوپتەگەن ماسەلە بار. بۇگىن ابدۋللا نيگمات ۇلىمەن كۇن تارتىبىندە تۇرعان بارلىق ماسەلە بويىنشا كەلىسىمگە كەلە الدىق دەپ سەنىممەن ايتا الامىن»، - دەپ اتاپ ءوتتى قىرعىزستان رەسپۋبليكاسىنىڭ پرەمەر-ءمينيسترى ساپار يساكوۆ.
وتىرىس بارىسىندا ايماقارالىق ىنتىماقتاستىق تۋرالى ءبىرقاتار كەلىسىمدەردى جۇزەگە اسىرۋ، ساۋدا-ەكونوميكالىق جانە ينۆەستيتسيالىق قاتىناستاردى كەڭەيتۋ مەن مادەني-قوعامدىق بايلانىستاردى ۇلعايتۋ، مەملەكەتتىك شەكارانى ءوتۋ ءتارتىبىن جەڭىلدەتۋ ماسەلەلەرى قارالدى. ماجىلىستە قابىلدانعان بارلىق شەشىمدەر ەكىجاقتى حاتتاماعا ەنگىزىلدى. ال شەكارا ماڭىنداعى وبلىستار كەڭەسىنىڭ كەلەسى وتىرىسى قىرعىزستاندا وتەتىن بولدى.