ماسقارا ۆيدەونى ءبىر- بىرىنەن ءسۇيىنشى سۇراپ، جەردەن جەتى قويان تاپقانداي جاھانعا جار سالىپ، جارىسا جاريالاپ جاتقاندارعا جۇرەكتى اۋىراتىنىن جەتكىزدى، - دەپ حابارلايدى Stan.kz.
ءانشى جەلىدەگى پاراقشاسىندا «اقىل توقتاتقان» ادامدارعا ارناپ جازبا قالدىردى.
«اسسالاۋماعالايكۋم، ارداقتى اعايىن! كەشەدەن بەرى whatsapp جەلىسى ارقىلى تارالىپ جاتقان ماسقارانى ءبىر- بىرىمىزدەن ءسۇيىنشى سۇراعانداي، جەردەن جەتى قويان تاپقانداي جاھانعا جار سالىپ، جارىسا جاريالاپ جاتقانىمىز جۇرەكتى اۋىرتادى. (حايپەرلەردىڭ «ەڭبەگىنىڭ جەمىسى» ) وزگە ۇلت وكىلدەرىنە ابدەن كۇلكى بولدىق- اۋ! ايتالىق، ناۋرىز مەيرامى كۇنى داستارقاننان سارقىت جيناپ جاتقان اعايىندى كۇلكى قىلىپ، whatsapp, instagram, FB جەلىلەرىنە تاراتتىق. نە ءۇشىن؟ قازاقتى مازاق قىلۋ ءۇشىن بە؟ ! بۇكىل ناۋرىز مەيرامى بويى كوزگە ىلىنەتىن ءبىر جاقسىلىق، يگى شارا كورمەدىك پە؟ ! تاراتىلىپ جاتقان زياندى سۋرەتتەر مەن ۆيدەولاردى جاريالاماۋلارىڭىزدى، باسقالارعا تاراتپاۋلارىڭىزدى ءوتىنىپ سۇرايمىن. ماسەلەن، ماعان ءبىر پايداسى جوق ۆيدەو كەلسە، دەرەۋ ءوشىرىپ تاستايمىن. جاماندىققا جاردەمشى بولۋ، كۇنانى كوپكە تاراتۋ كۇنانىڭ «اتاسى» ەكەنىن بىلەيىك. تەلەفوندارىڭىزداعى بارلىق جامان ۆيدەولاردى اللا رازىلىعى ءۇشىن ءوشىرىپ تاستاۋلارىڭىزدى سۇرايمىن. اسىرەسە، كوپشىلىك كورسىن دەگەن ماقساتپەن instagram, you tube جەلىلەرىنە جاريالاعان جانداردى ۇلت دۇشپانى دەپ سانايمىن. ورەسكەل قاتەلىككە ۇرىنعان ادامنىڭ نە، بالالاردىڭ ورنىنا ءوزىڭىزدى، اتا- اناڭىزدى، بالا- شاعاڭىزدى قويىپ كورىڭىزشى. شىبىن ساسىعان تەزەككە، ال بال اراسى جۇپار ءيىستى گۇلگە قونادى (قۇمار بولادى) . ءسىز دە ءوز تاڭداۋىڭىزدى جاساڭىز. اللا ءبارىمىزدى كەشىرسىن!»، دەپ جازدى ول.
مايعازيەۆتىڭ بۇل ۇسىنىسىن وقىرماندارى دا قولدادى.
ءبىرى «ءوز ۇلتىن ءوزى مازاق قىلىپ جەرگە تاپتاپ بەرەتىن ادامداردىڭ ساناسىندا قانداي وي بولادى ەكەن وسىنداي ۆيدەونى يۋتۋب جەلىسىنە جۇكتەگەندە . نەگە ءبىر يگى ىستەردى جۇكتەپ ماقتانباسقا»، دەسە ءبىرى، «وتە اقىلدى انگىمە ايتتىڭىز. وسىنداي ازاماتتارىمىز كوپ بولسىن!"، دەپ پىكىر قالدىردى.