قازاقستاننىڭ موڭعولياداعى توتەنشە جانە وكىلەتتى ەلشىسى قالىبەك قوبلانديننىڭ ايتۋىنشا، قازىرگى كەزدە رەيستى اشۋ بويىنشا كەلىسسوزدەر جۇرگىزىلىپ جاتىر.
«ەكى ەل اراسىنداعى كۇردەلى پروبلەمالاردىڭ ءبىرى - كولىكتىك-لوگيستيكالىق بايلانىس. ياعني، تىكەلەي ۇشۋ رەيستەرىن اشۋ قاجەت. قازىرگى كەزدە «استانا-ۇلانباتىر» اۋە رەيسىن اشۋ بويىنشا كەلىسسوزدەر جۇرگىزىلىپ جاتىر. امانشىلىق بولسا، وسى 2018-جىلى ەكى ەل اراسىندا تىكەلەي اۋە رەيسى اشىلادى دەگەن جوسپار بار»، - دەدى ق. قوبلاندين استانادا وتكەن باسپا ءسوز ءماسليحاتىندا.
ايتا كەتەيىك، موڭعولياعا اپاراتىن اۆتوكولىك جولدارى رەسەي ارقىلى وتەدى. بۇگىندە «الماتى - ولگەي» مەن «استانا - ولگەي» سياقتى اۆتوبۋس قاتىناستارى بار. بۇدان بولەك، «وسكەمەن-ريددەر-تاشانتا» اتتى قىسقا جولمەن دە قاتىناۋعا بولادى. اتالعان باعىتتا قازاقستان ريددەردەن رەسەي شەكاراسىنا دەيىنگى ۋچاسكەنىڭ قۇرىلىسىن اياقتادى. الايدا رەسەي فەدەراتسياسى موڭعولياعا دەيىنگى جولدى بىتىرمەي وتىر.