بۇل - 27 ميلليارد يۋان نەمەسە 4 ميلليارد ا ق ش دوللارىنا جۋىق. قىتاي اقشاسىمەن كەلىسىمشارت جاساعاندار اراسىندا ءىرى مۇناي ترەيدەرلەرى Trafigura, Glencore جانە Freepoint Commodities بار.
سونىمەن، الەمدىك مۇناي نارىعىندا جاڭا اببريەۆياتۋرا پايدا بولدى. INЕ- شاڭحاي حالىقارالىق ەنەرگەتيكالىق بيرجاسىنىڭ فيۋچەرسى قىسقاشا وسىلاي اتالادى.
ساراپشىلار: «قىتايدىڭ مۇنايدى ءوز ۆاليۋتاسىمەن ساتقىسى كەلۋى زاڭدى. ويتكەنى ول - الەمدەگى ەڭ ءىرى مۇناي تۇتىنۋشى ەل»، - دەيدى. ال قارا التىن ەكسپورتتاۋشى ەلدەر بولسا بۇعان قارسى ەمەس. رەسمي دەرەك بويىنشا، قىتاي مۇناي يمپورتىندا دا الەمدە كوش باستاپ تۇر. بىلتىر شىعىس كورشىمىز 610 ميلليون توننا پايدالانسا، سونىڭ 420 ميلليون تونناسىن سىرتتان ساتىپ العان.
ليۋ ديان، قارجىلىق زەرتتەۋ ينستيتۋتىنىڭ ساراپشىسى:
- شيكى مۇنايدىڭ قىتاي اقشاسىمەن ساتىلا باستاۋى - ونىڭ حالىقارالىق ۆاليۋتاعا اينالعانىن كورسەتەتىن ماڭىزدى وقيعا. مۇناي ساۋداسى تەك تۇرمىستىق تۇتىنۋمەن عانا شەكتەلمەيدى، ونىڭ استارىندا ساياسي، اسكەري، ستراتەگيالىق تەرەڭ ءمان جاتىر. بۇعان دەيىن شيكى مۇناي ساۋداسىندا ا ق ش دوللارى جەتەكشىلىك ەتىپ كەلدى. سونىڭ جەتەگىندەگى ايىرباس جۇيەسىندە جۇردىك. كوپتەگەن دامۋشى مەملەكەتتەردىڭ تاڭداۋ قۇقىعى بولمادى. ەندى وعان بالاما تابىلدى.
شاڭحاي حالىقارالىق ەنەرگەتيكالىق بيرجاسىنداعى ساۋدا- ساتتىقتىڭ العاشقى مينۋتىندا مۇناي باررەلى 440,20 يۋانعا باعالاندى. بۇل - 69 دوللار 71 سەنت. قازىر الەمدىك نارىقتا ادەتتەگى فيۋچەرستەردىڭ باعاسى دا ءدال وسىنداي. ساراپشىلاردىڭ ايتۋىنشا، بۇل كەلىسىمشارت ينۆەستورلاردىڭ قىزىعۋشىلىعىن تۋدىرسا، قىتاي بولاشاقتا مۇناي نارىعىنىڭ جاڭا ورتالىعىنا اينالۋى ابدەن مۇمكىن. وعان قوسا قىتايدىڭ شيكىزات فيۋچەرستەرىن ىسكە قوسۋدا تاجىريبەسى مول. ماسەلەن، 2015 -جىلى نيكەل جانە التىن كەلىسىمشارتتارى بويىنشا ساۋدا- ساتتىقتى ءساتتى وتكىزدى.
شاڭحاي حالىقارالىق ەنەرگەتيكالىق بيرجاسى مۇناي جەتكىزۋدى ومان، كاتار، يەمەن، يراك جانە شىعىس قىتايداعى پورتتار ارقىلى جۇزەگە اسىرادى. ال تاسىمالداناتىن قارا التىن جىجياڭ، شاندۇڭ، گۋاڭدۇڭ، لياۋنيڭ سياقتى جاعالاۋ مەن شاڭحاي پورتىنداعى 7 قويمادا ساقتايدى. قازىر الەمدەگى ەڭ ءىرى مۇناي بەنچماركتەرى نيۋ- يورك قور بيرجاسى مەن لوندون بيرجاسى سانالادى. ساراپشىلاردىڭ پىكىرىنشە، قىتايدىڭ وسى قاتاردا بولاتىن تولىق مۇمكىندىگى بار. اۆتورلارى: نۇربەك بەكەن، جان ءسۇي
www.24.kz