قازاقستاننىڭ «ۇزدىك اكتەرى» انىقتالدى
08:08, 29 - ناۋرىز 2018
استانا. قازاقپارات - اكتەر داۋرەن سەرعازين «ۇزدىك اكتەر» نوميناتسياسى بويىنشا «ساحناگەر-2018» ۇلتتىق سىيلىعىنىڭ يەگەرى اتاندى، دەپ حابارلايدى قازاقپارات استانا قالاسى مادەنيەت جانە سپورت باسقارماسىنىڭ باسپا ءسوز قىزمەتىنە سىلتەمە جاساپ.
قازاقستان تەاترلار قاۋىمداستىعى ۇيىمداستىرۋىمەن وتكەن، 27-ناۋرىز - حالىقارالىق تەاتر كۇنى مەرەكەسىنە وراي، جاستار تەاترىنىڭ نەگىزىن قالاۋشىلاردىڭ ءبىرى، كينو اكتەرى داۋرەن سەرعازين «ۇزدىك اكتەر» نوميناتسياسى بويىنشا «ساحناگەر-2018» ۇلتتىق سىيلىعىنىڭ يەگەرى اتاندى.
ول تەاتر ساحناسىندا حلەستاكوۆ، ليۋچەنتسيو، قوجا، ءامىر، ارتۋر سىندى كوپتەگەن رولدەرىمەن قالىڭ كورەرمەننىڭ جۇرەگىنەن ورىن الىپ جۇرگەن، كينو الەمىندە «الدار كوسە»، «ءشامشى اعا» بەينەلەرىمەن كوپشىلىك قاۋىمعا كەڭ تانىلعان.
سونداي-اق، جاس ءارى تالانتتى اكتريسا «تىلەپ-سارىقىز» قويىلىمىندا سارىقىزدىڭ سۇيكىمدى بەينەسىمەن، «موتسارت» ميۋزكلىندە الويزيانىڭ ادەمى ىرعاقتى داۋىسىمەن كورەرمەننىڭ كوز ايىمى بولىپ جۇرگەن نازەركە سەرىكبولوۆا ساحناگەردىڭ ارنايى «ءۇمىت» سىيلىعىمەن ماراپاتتالدى.