يتالياندىق ماماننىڭ باسقارۋىمەن «وتاشى روبوت» 50 جاستاعى ايەلدىڭ ءوت قابىن سىلىپ، الىپ تاستادى. ستەفانو دجيداروعا بىلتىر ميلان قالاسىندا بىلىكتىلىگىن ارتتىرعان نارتاي تۋراحانوۆ پەن رينات مۇزدىبايەۆ اسسيستەنت بولدى.
وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ اتالمىش روبوتتىڭ كومەگىمەن كۇنىنە 2-3 وتا جاسالاتىنىن ايتادى. ءساتتى وتكەن وتانى وبلىس اكىمى دانيال احمەتوۆ تە سىرتتان باقىلاپ تۇردى. ول شىعىس قازاقستاننىڭ الداعى 3 جىلدا مەديتسينا سالاسىنداعى كوشباسشى وڭىرگە اينالاتىنىن اتاپ ءوتتى.
وڭىردە روبوتتاندىرىلعان حيرۋرگيا جانە ترانسپلانتولوگيا ورتالىعى دەنساۋلىق ساقتاۋ مينيسترلىگىنىڭ قولداۋىمەن اشىلىپ وتىر.
«بۇل ورتالىقتى اشۋداعى باستى ماقساتىمىز - ەمدەۋ جانە دياگنوستيكالاۋ تاسىلدەرىن جەتىلدىرىپ، يننوۆاتسيالىق تەحنولوگيالار ەنگىزۋ. بارلىق جۇمىس الماتى جانە استانا قالالارىنداعى ۇلتتىق عىلىمي ورتالىقتاردىڭ قاتىسۋىمەن جۇزەگە اسادى» - دەيدى دانيال احمەتوۆ.
يتالياندىق ماماننىڭ بىرنەشە كۇندىك ساپارى بارىسىندا جەرگىلىكتى حيرۋرگتار باۋىر جىلاۋىعىن، ىشكى جارىقتاردى جانە سوقىر ىشەكتى الىپ تاستاۋ، ءوت قابىن سىلۋ سياقتى وتالاردى روبوتپەن جاساۋدى ۇيرەنبەك.
جەرگىلىكتى حيرۋرگتار يتاليالىق كومپانيا مەن باسقارمانىڭ اراسىنداعى قوندىرعى جەتكىزۋ كەلىسىمى اياسىندا وقىتىلماق. ياعني، مامانداردىڭ بىلىكتىلىگىن ارتتىرۋعا قوسىمشا شىعىن كەتپەيدى.
«بۇعان دەيىن اتالمىش اۋرۋحانانىڭ 4 مامانى ميلاندا 2 اپتالىق كۋرستان وتكەن بولاتىن. كەلىسىمشارت اياسىندا تاعى 4 ماماندى وقىتۋ جوسپارلانىپ وتىر» - دەيدى وبلىستىق دەنساۋلىق ساقتاۋ باسقارماسىنىڭ باسشىسى مارات شورانوۆ.
ستەفانو دجيدارو روبوتتاندىرىلعان وتا جۇيەسىن جاساۋعا ءومىرىنىڭ 8 جىلىن ارناعان ەكەن. وسى تاقىرىپتا 12 عىلىمي ەڭبەك جازىپتى. سوڭعى 2 جىلىن ەۋروپا مەن ازيا ەلدەرىنىڭ ماماندارىنا اتالمىش تەحنولوگيانى ۇيرەتۋگە ارناپ كەلەدى.
حيرۋرگيالىق وتا ءبولىمىنىڭ مەڭگەرۋشىسى سەرگەي بەلىحتىڭ ايتۋىنشا، روبوت جۇمىسىنان اقاۋ شىققان جاعدايدا دارىگەر وتاعا تىكەلەي ارالاسا الادى.
اتالمىش جۇيە جالپى حيرۋرگيا، ۋرولوگيا، گينەكولوگيا جانە كەۋدە بولىگىنىڭ حيرۋرگياسى سالالارىنا ارنالعان. اۋرۋحانادا جىل اياعىنا دەيىن بۇيرەك الماستىرۋ وتاسىن جاساۋ جوسپارلانعان. ورتالىق وعان قاجەت قۇرالدارمەن تولىقتاي جابدىقتالعان. سوڭعى 2 جىلدا اۋرۋحانانى تەحنولوگيالىق تۇرعىدان جەتىلدىرۋ ءۇشىن بيۋدجەتتەن 3,7 ميلليارد تەڭگە بولىنگەن.
اۆتور: ەسىمجان ناقتىباي