قىتايلىقتاردىڭ قازاقستانعا دەگەن قىزىعۋشىلىعى ارتىپ كەلەدى - ەلشى حانحۋەي
ق ح ر- دىڭ قازاقستانداعى توتەنشە جانە وكىلەتتى ەلشىسى چجان حانحۋەيدىڭ ايتۋىنشا، قىتاي ەلى قازاقستاندى ستراتەگيالىق ارىپتەس ءارى شىنايى دوس دەپ بىلەدى.
«الىستاعى اعايىننان جاقىنداعى كورشى ارتىق» دەيدى عوي، ءبىز ءۇشىن قازاقستان دا سولاي. ءبىزدىڭ قارىم-قاتىناسىمىز مىڭداعان جىل بۇرىن قالىپتاستى. سونى ارى قاراي جالعاستىراتىن بولامىز. مەنىڭشە، بۇگىندە ءبىزدىڭ ورتاق مۇددەلەرىمىز ارتىپ كەلەدى، ورتاق كوزقاراسىمىز دا بار»، - دەدى چ. حانحۋەي جۋرناليستەرگە بەرگەن سۇحباتىندا.
ەلشىنىڭ سوزىنە قاراعاندا، بۇگىندە قىتاي حالقى اراسىندا قازاقستانعا دەگەن قىزىعۋشىلىق ارتىپ وتىر.
«جاقىندا قىتايداعى جاڭا جىلدىق مەرەكەگە ارنالعان گالا-كونسەرت ۇيىمداستىرىلعان بولاتىن. سول جەردە قازاقستان جايىندا ءۇش رەت ايتتى. ديماش تا ونەر كورسەتتى. نەگىزى، قازىرگى كەزدە قىتايدا قازاقستان كەڭىنەن تانىلىپ، جەرگىلىكتى حالىقتىڭ وسى ەلگە دەگەن قىزىعۋشىلىعى ارتىپ كەلەدى. قازاقستانعا، قازاق حالقىنا دەگەن ىقىلاسى ارتىپ كەلەدى»، - دەپ اتاپ كورسەتتى چ. حانحۋەي.