ناۋرىز مەيرامى فينليانديادا تۇراتىن ورتالىق ازيا حالىقتارىنىڭ باسىن بىرىكتىردى
ءىس-شارا «جۇلدىز» ورتالىق ازيا ەلدەرى اسسوتسياتسياسى مەن «ساۋلە» مادەنيەت ورتالىعىنىڭ باستاماسىمەن جانە قازاقستاننىڭ فينلياندياداعى ەلشىلىگىنىڭ قولداۋىمەن فينليانديا جۇرتشىلىعىن ورتالىق ازيا حالىقتارىنىڭ مادەني مۇراسىمەن تانىستىرۋ ماقساتىندا ۇيىمداستىرىلدى.
«جۇلدىز» جانە «ساۋلە» بىرلەستىكتەرىنىڭ بەلسەندىلەرى، قازاقستاننىڭ فينلياندياداعى ەلشىسى مۇرات نۇرتىلەۋوۆ جينالعان قاۋىمدى ورتالىق ازيانىڭ باۋىرلاس حالىقتارى ءۇشىن جاڭا ءومىردى، جاڭارۋدى جانە بىرىگۋدى بىلدىرەتىن «كوكتەمگى كۇن مەن ءتۇننىڭ تەڭەلۋى كۇنىمەن» قۇتتىقتاپ، ىزگى تىلەكتەرىن جەتكىزدى.
ءوڭىر مەملەكەتتەرى باسشىلارىنىڭ بيىلعى 15- ناۋرىزدا استاناداعى تاريحي كەزدەسۋىنىڭ ناتيجەلەرىنە ەرەكشە نازار اۋدارىلدى. «جۇلدىز» اسسوتسياتسياسىنىڭ باسشىسى ءماۆلۇدا پەيپونەن:
«سۋوميدەگى قازاقتار، وزبەكتەر، قىرعىزدار، تاجىكتەر جانە تۇرىكمەندەر وقيعانىڭ تىنىسىن تەرەڭ ۇعىندى. بۇل شىندىعىندا ەلدەرىمىز اراسىنداعى قازىرگى قارىم-قاتىناستار تاريحىندا جاڭا بەلەس بولىپ تابىلادى.
وسى ورايدا، مەن ءۇشىن كەلەشەك گۇلدەنۋى ءبىر-ءبىرىنسىز مۇمكىن ەمەس ءوڭىرىمىز ءارقاشان ءبىرتۇتاس ساياسي، ەكونوميكالىق جانە مادەني الاڭ ەكەنىن اتاپ وتكىم كەلەدى. سوندىقتان، ءبىز بارلىق باۋىرلاس حالىقتاردى بىرىكتىرەتىن جانە ورالىق ازيا ەلدەرىنىڭ فينليانديامەن ءوزارا ءتيىمدى بايلانىستارىن كەڭەيتۋگە مۇمكىندىك بەرەتىن اسسوتسياتسيا قۇرۋ تۋرالى باستاما كوتەردىك.
سونىمەن قاتار، مەن باسقاراتىن قوعامدىق ۇيىمنىڭ مىندەتى - نەگىزگى قۇرامى داۋسىز ورتالىق ازيا مۇراسى بولىپ تابىلاتىن جاھاندىق رۋحاني جانە مادەني باعدارلاردى قالىپتاستىرۋ»، - دەگەن پىكىرلەرىمەن ءبولىستى.
«ساۋلە» قوعامداستىعىنىڭ بەلسەندى مۇشەلەرىنىڭ ءبىرى گاۋحار ءالىمحانوۆا: «ءبىز استاناداعى جانە كورشىلەس ەلدەردەگى جاڭالىقتاردى مۇقيات قاراپ وتىرامىز. ورتالىق ازيادان شىققان فينليانديا تۇرعىندارىنىڭ كوپشىلىگى دە تاتۋ كورشىلىك پەن تىعىز كووپەراتسيا جالپى جەتىستىكتىڭ كەپىلى رەتىندە قابىلداناتىن جەتپىس ميلليون حالقى بار ءوڭىردىڭ اجىراماس بولىگى رەتىندە سەزىنەدى.
قازاقستان استاناسىنداعى بيىك دەڭگەيدەگى كەزدەسۋ بىزدەر ءۇشىن 2018-جىلدىڭ باسىنداعى ەڭ ءىرى جانە قۋانىشتى ساياسي وقيعا بولدى. ءبىز استانادا كوشباسشىلارىمىز بەن مەملەكەتتەرىمىزدىڭ بىرلىگىن كوردىك، قارىم-قاتىناستاردى نىعايتۋ ءۇشىن جاڭا سەرپىننىڭ پايدا بولعانىن، باۋىرلاس حالىقتار اراسىنداعى ءداستۇرلى دوستىق بايلانىستارىن تەرەڭدەتۋگە دەگەن ساياسي ەرىك پەن نىق ۇمتىلىستى بايقادىق.
بۇل كەزدەسۋدىڭ وڭىرلىك ىنتىماقتاستىقتا جاڭا بەلەس اشاتىنىنا سەنىمدىمىن، بىزدەر ورتاق داۋلەت پەن تۇراقتىلىققا اپارار ۇلكەن جولدىڭ باسىندا تۇرمىز. ءبىز فينلياندياداعى ەڭ ءىرى ورتالىق ازيا دياسپوراسى رەتىندە پرەزيدەنتىمىزدىڭ جاسامپاز ويلارىن قولداپ، ىلگەرىلەتۋگە نيەتتىمىز»، - دەپ اتاپ ءوتتى.
ءىس-شارا قوناقتارىنا ءوڭىر حالىقتارى مادەني مۇراسىنىڭ، سالت-داستۇرلەرىنىڭ بار بايلىعىن كورسەتكەن وڭتۇستىك قازاقستان شىعارماشىلىق توبىنىڭ دارىندى ورىنداۋشىلارى مەن ورتالىق ازيا دياسپوراسىنىڭ كونسەرتتىك باعدارلاماسى كورەرمەندەردىڭ ەرەكشە قوشەمەتىنە بولەندى.قازاقستان ديپلوماتتارى ءىس-شارا بارىسىندا قوناقتارعا ەلىمىزدىڭ ۇلتارالىق جانە كونفەسسياارالىق كەلىسىم سالاسىنداعى جەتىستىكتەرى مەن باستامالارى، سونداي-اق ەلىمىزدە «100 قادام» ۇلت جوسپارى، «نۇرلى جول» جاڭا ەكونوميكالىق ساياساتى جانە «ءۇشىنشى جاڭعىرۋ: جاھاندىق باسەكەگە قابىلەتتىلىك»، «رۋحاني جاڭعىرۋ» باعدارلامالارى اياسىنداعى ساياسي، ەكونوميكالىق جانە الەۋمەتتىك تۇرمىستاعى ءۇش بىرلىكتى جاڭعىرۋدى ىلگەرىلەتۋ بارىسى جايلى ايتىپ بەردى.