وبلىستىڭ اكىمى دانيال احمەتوۆ تاسقىننىڭ ەكىنشى تولقىنىنان ەڭ كوپ زارداپ شەككەن گلۋبوكە اۋدانىنا تۇندەلەتىپ باردى. مۇنداعى گلۋبوچانكا وزەنى ارناسىنان اسىپ، بىرنەشە ەلدى مەكەن سۋ استىندا قالعان. اۋدان ورتالىعى گلۋبوكوە كەنتىنىڭ وزىندە 29 ۇيگە سۋ كىرگەن ەكەن.
ەسكە سالا كەتسەك، گلۋبوكوە اۋدانىندا توتەنشە جاعداي جاريالانعان ەدى.
«سۋ كەشە تاڭەرتەڭ جايىلا باستادى. توتەنشە جاعداي ماماندارى شلاك توكتى. سونى قاپتاپ، سۋدىڭ جولىنا توسقانبىز، ناتيجە بولمادى. قوراجايىمىز بەن قۇدىعىمىز سۋ استىندا قالدى. اۋىزسۋدى بيىكتە ورنالاسقان ۇيلەردەن الىپ وتىرمىز. سۋ جەرتولەدەن ءبىر- اق شىقتى. ءۇيدىڭ ىرگەسىنە اۋەلى پوليەتيلەن توسەپ، ونىڭ بەتىنە قۇمقاپ جيناعانبىز. ونى جاساماعان ۇيلەرگە قىزىل اسىقتان سۋ كىردى» - دەيدى ءۇيىن سۋ باسقان تۇرعانداردىڭ ءبىرى قازيما قاسەنوۆا.
ۇيلەرگە كىرگەن سۋدىڭ بەتىن قايتارۋ ءۇشىن كوپىردىڭ ءبىر جاعىن جىرىپ، اعىس كەپتەلگەن تۇستى كەڭەيتۋ كەرەك دەگەن شەشىم قابىلدانىپتى. دانيال احمەتوۆ ول جۇمىستىڭ ءتيىمسىز ۇيىمداستىرىلعانىن سىنعا الدى.
«قاۋقارسىز تەحنيكامەن جولدى جىرىپ بولعانشا قانشا ۋاقىت كەتەتىنىن ايتۋدىڭ ءوزى قيىن. مىنا ەكى تەحنيكانىڭ ورنىنا ۇلكەن ەكسكاۆاتور قويعاندا جۇمىس 10 ەسە جىلدام ءجۇرۋشى ەدى. وسىنىڭ ءبارىن باسپەن ويلاپ ىستەۋ كەرەك بولعان. تۇندە مىنا تەحنيكالاردىڭ ورنىنا 2 ۇلكەن ەكسكوۆاتور اكەلىنەتىن بولسىن» - دەدى ول.
ۇيىنە كىرە الماي قالسا دا، وبلىس اكىمىنىڭ كەلەتىنىن ەستىپ، كوشەدە سابىلىپ جۇرگەن تۇرعىندار تالاپ-تىلەكتەرى مەن شاعىمدارىن ايتتى. ولاردىڭ ايتۋىنشا تاسقىن باستالعان ساتتە-اق تۇرعىندار كوپىردىڭ شەتىن جىرىپ، ارنانى كەڭەيتۋدى ۇسىنعان ەكەن.
وبلىس اكىمى ءۇيى بۇلىنگەن تۇرعىنداردىڭ ەشقايسىسى وتەماقىسىز قالمايتىنىن ايتتى.
«گلۋبوچانكا وزەنى ارناسىنا سىيماي كەتىپ، وسىنداي جاعداي بولىپ وتىر. 2 كۇننىڭ ىشىندە ارنايى كوميسسيا بارلىق سۋ العان ۇيلەردى تەكسەرەدى. كىرۋ مۇمكىن ەمەس بولعان ۇيلەردىڭ ماسەلەسى سۋ قايتقان سوڭ قارالادى. سول تەكسەرۋلەر ناتيجەسىندە تۇرۋعا جارامسىز بولعان ءۇي يەلەرىنە باسقا ءۇي نەمەسە پاتەر بەرىلەدى. بۇلىنگەن ۇيلەر جوندەلەدى» - دەدى دانيال احمەتوۆ.
جالپى اۋدان بويىنشا سۋ العان ۇيلەردىڭ سانى 163 كە جەتىپ وتىر. ولاردان 566 ادام قاۋىپسىز جەرگە كوشىرىلگەن. الەۋمەتتىك نىساندار بازاسىندا قۇرىلعان ۋاقىتشا باسپانالاردى سولاردىڭ تەك 60 ى عانا پانالاۋدا. قالعاندارى تۋىسقاندارىنىڭ ۇيىنە ورنالاسىپتى.
ايماق باسشىسى ورالحان بوكەي اتىنداعى مەكتەپكە ۋاقىتشا كوشىرىلگەن تۇرعىنداردىڭ حال-جاعدايىن ءبىلدى. مۇندا 6 بالا، 6 ەرەسەك ادام ورنالاستىرىلىپتى. مەكتەپ ديرەكتورى سپورت زالعا تاعى 150 ادام قابىلداۋعا بولاتىنىن ايتادى.
«ەڭ ءبىرىنشى وسى مارفۋعا شەكەرباي ەكەۋىمىزدىڭ ءۇيىمىزدى سۋ باستى. مەكتەپ ديرەكتورىنا كورسەتىپ جاتقان كومەگى ءۇشىن راحمەت. «نۇر وتان» پارتياسىنىڭ اتىنان انۋاربەك مۇقتارحانوۆ دەگەن ازامات كەلىپ، جاعدايىمىزدى ءبىلىپ كەتتى» - دەدى گۇلميرا قاليەۆا.
وبلىس باسشىسى مۇنداعى ادامدارعا دا ءۇي قۇلاسا ورنىنا باسپانا بەرىلەتىنىن، قيراپ-بۇلىنگەن مۇلىكتىڭ بارلىعىنا وتەماقى تولەنەتىنىن تاعى دا باسا ايتتى.
دانيال احمەتوۆتىڭ ايتۋىنشا سوڭعى 3 تاۋلىكتە گلۋبوكوە اۋدانىنان بولەك وسكەمەن قالاسىندا 60 ءۇيدى، كاتونقاراعاي اۋدانىندا 4 ءۇيدى سۋ العان.
«ەكى كۇننىڭ ىشىندە 78 ميلليمەتر جاڭبىر جاۋعان. بۇل ءۇش ايدىڭ مولشەرىنەن اسادى. گلۋبوكوە اۋدانىندا سۋ العان اۋىلدار دا، وسكەمەننىڭ شەتىندەگى جەكە سەكتورلار دا شۇڭقىرلى جەردە ورنالاسقان. مەزگىلسىز جاۋىن ءجىبىپ ۇلگەرمەگەن توڭنىڭ بەتىمەن ۇيلەرگە جايىلىپ وتىر. بۇعان دەيىن اياگوزدەگى تاسقىننان زارداپ شەككەن وتباسىلارعا بارلىعى 189 ميلليون تەڭگە ءبولىندى. ال وسكەمەندەگى تاسقىننىڭ سالدارىن جويۋعا قالا بيۋدجەتىنەن قارجى جۇمسالۋدا. گلۋوبوكوە اۋدانىنداعى سۋ باسقان ۇيلەردىڭ تەڭ جارتىسى تەكسەرىلدى. قالعانىن 2 كۇننىڭ ىشىندە قاراپ شىعادى. سونىڭ ناتيجەسى بويىنشا ءتيىستى كوزدەردەن قارجى بولىنەدى» - دەدى اكىم.