وبلىس ورتالىعىنداعى ناۋرىز تويى ىرگەلەس زارەچنىي اۋىلىنداعى «ارعىماق» يپپودرومىنداعى ۇلتتىق سپورت ويىندارىمەن جالعاستى. الدىمەن، وبلىس ورتالىعىنىڭ تۇرعىندارى مەن قوناقتارىن ايماق باسشىسى ارحيمەد مۇحامبەتوۆ قۇتتىقتادى.
«ءدال وسى كۇنى ادامدار ءبىر- بىرمەن كورىسىپ، اراداعى وكپە- نازىن ۇمىتقان، ىزگى تىلەكتەر ايتىلىپ، ۇلكەننىڭ باتاسىن العان. ناۋرىز مەرەكەسى تاۋەلسىزدىكتىڭ ارقاسىندا حالقىمىزبەن قايتا قاۋىشتى. بۇل تەك كوكتەمنىڭ عانا ەمەس، ەڭ اۋەلى ىزگىلىك پەن ىرىستىڭ، تاتۋلىق پەن بىرلىكتىڭ مەرەكەسى. تار جەردە تابىستىرىپ، كەڭ جەردە كەلىستىرە بىلگەن ەلدەگى دوستىقتىڭ بەلگىسى. بۇگىندە قازاقستان الەمدىك قاۋىمداستىقتا ەتنوس پەن كونفەسسياارالىق كەلىسىمنىڭ ۇلگىسى رەتىندە تانىلعان مەملەكەت. سوندىقتان وسىناۋ ۇلىستىڭ ۇلى كۇنىندە تاتۋلىعىمىز ودان سايىن نىعايىپ، مۇرات تۇتقان بارلىق يگى باستامالارىمىز وڭىنان ورىندالسى»! - دەدى وبلىس باسشىسى.
اكىم سوزىنەن كەيىن جەرگىلىكتى ونەرپازدار شاعىن كونتسەرتتىك باعدارلاما ۇسىندى.
جيىلعان جۇرت قىز قۋۋ مەن اۋدارىسپاق ويىنىن دا تاماشالادى.
بىلەكتىلەر ءۇشىن قويدى مويىنعا سالىپ كوتەرۋدەن جارىس ۇيىمداستىرىلدى. 80 كەلىگە دەيىنگى قاتىسۋشىلار اراسىنان ۆيكتور سيريك وزدى. ول قويدى 2 مينۋتتا 52 رەت كوتەردى. ال اۋىر سالماقتا سىنعا تۇسكەندەردىڭ سىيلىعىن اناتولي مۋلين ولجالادى. اناتوليي قويدى 71 رەت يىعىنان اسىردى.
«مەن ناۋرىز تويىندا وتەتىن سپورت شارالارىنا ءبىرىنشى رەت قاتىسىپ وتىرمىن. قويدى يىققا سالىپ كوتەرۋ سپورتى وزىمە قاتتى ۇنادى. مۇندا تەك كۇش قانا ەمەس، ايلا- تاسىلدەر دە كەرەك. ورتاق مەيرامىمىز ناۋرىزدا وسىنداي ۇلتتىق سپورت ويىندارىنىڭ قاتارى كوبەيسە دەگەن تىلەك بار»، - دەيدى اناتوليي مۋلين.
بايگە دەسە، دەلەبەسى قوزبايتىن قازاق بار ما؟! بايگەگە رەسپۋبليكانىڭ تۇكپىر- تۇكپىرىنەن جانە رەسەيدەن تۇلپارلار جينالدى. اۋەلى، 3 شاقىرىمدىق توق بايگەنىڭ جەڭىمپازدارى انىقتالدى. ءبىر قىزىعى، جۇلدەلى ءۇش ورىندى ءجىتىقارا اۋدانىنىڭ قۇناندارى ءوزارا ءبولىستى. باس بايگە ەرنۇر قۇتەگەن ەسىمدى شاباندوزدىڭ ەنشىسىندە كەتتى.
مۇنان سوڭ تاناۋىن كوككە شانشىتىپ، كەكىلىن جەل تاراعان 26 كۇلىك الامانعا ءتۇستى. مارەگە ەكى اينالىم قالعاندا شىن سايگۇلىكتەر العا سۋىرىلىپ شىعىپ، قالعاندارىنان ارالارى الشاقتاي باستادى. جۇرت كومبەگە بەتتەگەن جۇيرىكتەردى قيقۋلاپ قارسى الىپ جاتتى. سونىمەن، رەسەيدەن اكەلىنگەن «يۋمور» اتتى ارعىماق باس جۇلدەنى ەنشىلەدى. ونىڭ يەسى - راميل سالاحوۆ. ءجىتىقارالىق حانسۇلتان جانداۋلەت مىنگەن «تورىن» تۇلپارى مارە سىزىعىن ەكىنشى بولىپ كەستى. ۇزدىك ۇشتىكتە - «زاربينا» . بۇل سايگۇلىك تاران اۋدانىنان قاتىستىرىلدى.
اۆتور: قاسقىرباي قويشىمانوۆ