دەپ حابارلايدى «قازاقپارات» ح ا ا مەنشىكتى ءتىلشىسى.
«ءبىز كاسىبىمىزدى 1,5 جىل بۇرىن باستادىق. ماعان كيىز ءۇي جاساعان ۇنايدى: ونىڭ ءپىشىنى، ىشىندەگى احۋالى - بارلىعى ءمىنسىز»، - دەدى بەلگياداعى كيىز ءۇي ءوندىرۋشى Be Yurt فيرماسىنىڭ نەگىزىن قالاۋشى ستەفان كليموۆسكي.
شەتەلدىك كاسىپكەر ەشقاشان ورتالىق ازياعا بارماعان بولىپ شىقتى، ول كوشپەندىلەردىڭ باسپاناسىن ينتەرنەت ارقىلى بىلگەن ەكەن. ءوزىنىڭ دوسى يانن بەرلەمونتپەن بىرگە سۋرەتكە قاراپ وتىرىپ، كيىز ءۇيدىڭ سىزباسىن سالىپ، العاشقى پروتوتيپىن جاساعان. ول قىسقا ۋاقىتتىڭ ىشىندە ساتىلىپ كەتكەن.
«بەلگيادا بارلىق عيماراتتار ءتورتبۇرىشتى پىشىندە، ءبىراق بىزگە بۇل ۇنامايدى. ءبىز مۇنى بەلگياداعى قۇرىلىستىڭ جاڭا سەرپىنى دەپ ەسەپتەيمىز»، - دەپ اتاپ ءوتتى ول.
«ورتالىق ازيادا جەل قاتتى سوعادى، ءبىراق جاۋىن- شاشىن از. ءبىز كيىز ءۇيدى بيىك ەتىپ جاساۋدامىز. سول ءۇشىن جاڭبىر جاۋعاندا، سۋ تەز اعىپ كەتەدى. ەۋروپاداعى ساتىپ الۋشىلار وقشاۋلىق پەن ىڭعايلىلىقتى قالايتىندىقتان، ازداپ تۇرلەندىردىك. كيىز ءۇيدىڭ ءتۇسىن دە وزگەرتتىك. مۇنداعى ادامدار اشىق ءتۇستى جاقسى كورەدى»، - دەدى س. كليموۆسكي.
كيىز ءۇيدىڭ شاڭىراعى ەكى قاباتتى شىنى پلاستيكتەن جاسالعان. فيرما كليەنتتىڭ تالعامىنا قاراي مەزونين، بولمەلەر، ۆاننا مەن اجەتحانا جاساي الادى. باسپاناعا جارىق پەن كارىز تارتىلادى. جىلۋ ورگانيكالىق وتىن ارقىلى قاۋىپسىز پەشپەن بەرىلەدى.
«كيىز ءۇيدىڭ بىرنەشە قاباتى بار. ونىڭ سىرتقى قاباتى - تولىقتاي سۋ وتكىزبەيدى. قابىرعالارى مەن كۇمبەزىندە ەنى 10-20 س م بولاتىن جىلىلىق ساقتاعىشى بار. كيىز ءۇيدىڭ ءىشى ماقتادان جاسالعان ماتامەن قاپتالعان. ەدەنى ەمەن مەن قاراعايدان جاسالادى»، - دەدى شەتەلدىك.
س. كليموۆسكيدىڭ ايتۋىنشا، ەۋروپادا كوشپەندىلەردىڭ ءداستۇرلى تۇرعىن ۇيىنە دەگەن قىزىعۋشىلىق ارتىپ كەلەدى. بۇگىندە ولاردىڭ فيرماسىنا كوپتەگەن تاپسىرىستار تۇسۋدە، وسىعان وراي ولار قىزمەتكەرلەر سانىن ارتتىرۋعا ءماجبۇر بولعان.
«كيىز ءۇيدى تۇرعىن ءۇي رەتىندە دە، وعان قوسىمشا رەتىندە دە ساتىپ الىپ جاتىر. ديامەترى 8 مەتر بولاتىن كيىز ءۇيدى 4-6 اپتادا جاسايمىز، ونى ورناتۋعا 3-5 كۇن كەتەدى»، - دەدى س. كليموۆسكي.
س. كليموۆسكي كيىز ۇيلەردىڭ بەلگيادان بولەك، فرانسيادا دا تانىمال ەكەندىگىن جانە وندا كوشپەندىلەردىڭ باسپاناسىنان قۇرالعان بىرنەشە قوناق ءۇي بار ەكەندىگىن اتاپ ءوتتى. شەتەلدىك كاسىپكەرلەر اردەننادا ءوز قوناق ۇيلەرىن اشۋعا نيەتتى.