قوجا احمەت ءياساۋيدىڭ «ديۋاني حيكمەت» قولجازبا كىتابى تۇركىستانداعى مۇراجايعا تابىستالدى

 شىمكەنت. قازاقپارات - قوجا احمەت ءياساۋيدىڭ «ديۋاني حيكمەت» قولجازبا كىتابى تۇركىستانداعى مۇراجايعا تابىستالدى. بۇل تۋرالى ءوڭىردىڭ مادەنيەت باسقارماسىنىڭ باسپا ءسوز قىزمەتى جاريا ەتتى، دەپ حابارلايدى قازاقپارات ءتىلشىسى.

باسقارمانىڭ باسپا ءسوز حاتشىسى مادينا سابىردىڭ ايتۋىنشا، قۇندى قولجازبانى كيەلى شاھارداعى «ازىرەت سۇلتان» مۇراجايىنا قوجا احمەت ءياساۋيدىڭ 27-  ۇرپاعى اكەلگەن.

«ازىرەت سۇلتان» مەملەكەتتىك تاريحي- مادەني قورىق- مۋزەيىنە تۇركيا رەسپۋبليكاسى، ستامبۋل قالاسىنان ياساۋيتانۋشى عالىم، «Yesevi ocaklarى» جۋرنالىنىڭ باس رەداكتورى يسمەتۋللا ياساۋي كەلدى. قورىق- مۇراجايدا وتەتىن ۇلىستىڭ ۇلى كۇنى - ناۋرىز مەرەكەسىنە ارنالعان مادەني ءىس- شارا بارىسىندا يسمەتۋللا ياساۋي سالتاناتتى تۇردە قوجا احمەت ءياساۋيدىڭ «ديۋاني حيكمەت» قولجازبا كىتابىن «ازىرەت سۇلتان» قورىق- مۋزەيىنە تاپسىردى» ، - دەيدى مادينا سابىر.

 

ايتا كەتەيىك، ديۋاني حيكمەت، «اقىل كىتابى» - قوجا احمەت ءياساۋيدىڭ سوپىلىق يدەياسىن جىر ەتكەن، ەتيكالىق- ديداكتيكالىق مازمۇنداعى ادەبي شىعارماسى بولىپ تابىلادى. اقىن ءوز كىتابىن قىپشاق دالاسى مەن ورتالىق ازيا تۇركىلەرىنە كەزىندە تۇسىنىكتى بولعان شاعاتاي تىلىندە جازعان. «ديۋاني حيكمەتتىڭ» ءتۇپنۇسقاسى ساقتالماعان. ەڭ ەسكى نۇسقاسى XV عاسىردىڭ ورتا كەزىندە اراب ارپىمەن كوشىرىلگەن. بەرتىن كەلە «ديۋاني حيكمەت» قازان (1887-1901) ، ىستانبۇل (1901) ، تاشكەنت (1902-11) باسپالارىنان جارىق كورگەن.