قىتايلىق كومپانيا رەنتگەن زاۋىتى اۋماعىندا نەمەسە يندۋستريالدىق ايماقتا مەديتسينالىق تەكسەرۋ جابدىقتارىن شىعارماق، دەپ حابارلايدى قازاقپارات ءتىلشىسى.
اقتوبە وبلىسىنىڭ اكىمدىگىندە وبلىس اكىمى بەردىبەك ساپاربايەۆ پەن «NUCTECH» كومپانياسىنىڭ ۆيتسە- پرەزيدەنتى لي تسزيانمين كەزدەستى. جوسپار بويىنشا «اقتوبەبرەنتگەن» ا ق بازاسىندا بىرلەسكەن كاسىپورىن نەمەسە «اقتوبە» يندۋستريالىق ايماعىندا جاڭا زاۋىت سالىنادى.
«ءسىزدىڭ كومپانياڭىز قازاقستانمەن 10 جىلدان استام ۋاقىتتان بەرى ىنتىماقتاستىقتا جۇمىس ىستەپ كەلەدى. اقتوبە وبلىسى وسى جوبانى جۇزەگە اسىرۋعا مۇددەلى جانە قولدانىستاعى زاڭناما اياسىندا جان- جاقتى قولداۋ كورسەتۋگە دايىن» ، - دەدى وبلىس اكىمى بەردىبەك ساپاربايەۆ.
كەزدەسۋدە قىتايلىق ينۆەستورلارعا ءوڭىردىڭ ارتىقشىلىقتارى، ونىڭ ىشىندە گەوگرافيالىق ورنالاسۋى، كولىك جانە لوگيستيكالىق ينفراقۇرىلىمى ءتۇسىندىرىلدى. بەردىبەك ساپاربايەۆ «اقتوبە» يندۋستريالىق ايماعى، «اقتوبە» ا ك ك جانە ينۆەستورلارعا قىزمەت كورسەتۋ ورتالىعى تۋرالى ايتىپ بەردى. ال لي تسزيانمين ىنتىماقتاستىقتى كەڭەيتۋگە قىزىعۋشىلىعى بار ەكەنىن ايتىپ ءوتتى. جوبا «نۇرلى جول» باعدارلاماسىندا ايتىلعان «ءبىر بەلدەۋ - ءبىر جول» باستاماسى اياسىندا ىسكە اسىرىلادى.
«ءبىز «اقتوبەرەنتگەننىڭ» وندىرىستىك بازاسىمەن تانىستىق. رەنتگەن زاۋىتىنىڭ وندىرىستىك بازاسى جاقسى ەكەن. قازىرگى كەزدە ءبىز زاۋىت قىزمەتكەرلەرىن قىتايعا شاقىرىپ، كومپانيامەن ءجىتى تانىسۋدى ۇسىنىپ وتىرمىز. وسىدان كەيىن ىنتىماقتاستىق ماسەلەلەرىن ەگجەي- تەگجەيلى تالقىلاي الامىز» ، - دەدى ل. تسزيانمين.
اقتوبە وبلىسى اكىمىنىڭ باسپا ءسوز قىزمەتىنىڭ حابارلاۋىنشا، 1997 -جىلى قۇرىلعان «NUCTECH» كومپانياسى جوعارى تەحنولوگيالىق قاۋىپسىزدىك تەحنيكاسىن ازىرلەۋگە جانە وندىرۋگە ماماندانعان. بۇگىنگى كۇنى كومپانيا ونىمدەرى الەمنىڭ 122 ەلىنە جەتكىزىلەدى. ال ينۆەستورلارمەن اراداعى كەلىسىم وبلىس اكىمى بەردىبەك ساپاربايەۆتىڭ قىتايعا ساپارى كەزىندە جاسالعان بولاتىن.