«قازاقستاندا كوكتەمنىڭ شۋاق شاشقان العاشقى كۇندەرىنە تاپ وسى وڭتۇستىك تۇرعىندارىنداي شاتتاناتىن ەشكىم جوق شىعار، ءسىرا. ويتكەنى كوكتەم جاۋقازىندار گۇل اشىپ، اينالانى اسەمدىككە بولەيتىن تاماشا كەز. كوكتەم كەلىسىمەن گۇلدەر شاھاردا تاپ ءبىر كىلەم توسەپ قويعانداي ءتۇرلى تۇسكە بولەنىپ، جايقالىپ تۇرادى. بيىل شىمكەنتتە 1 ميلليون 37 مىڭ جاۋقازىن ەگىلگەن. گۇلدەردىڭ ەڭ ۇلكەن كومپوزيتسياسى قالا سيمۆولى - «جاۋقازىن» سۋبۇرقاعىندا ورنالاسقان»، - دەپ حابارلايدى و ق و- نىڭ تۋريزم ورتالىعىنىڭ وكىلدەرى فەيسبۋك پاراقشاسىندا.
سوندىقتان شىمكەنتتىكتەر ەل تۇرعىندارىن ءبارىن تاستاپ، وبلىستىڭ باس قالاسىنا كەلۋگە شاقىرىپ وتىر.
سونىمەن قاتار جازبادا شىمكەنتكە ەلدىڭ كەز كەلگەن جەرىنەن ۇشاقپەن قانداي باعاعا ۇشىپ كەلۋگە بولاتىنى جازىلىپتى (ەكى باعىتقا شامامەن 25-30 مىڭ تەڭگە). ال پويىزبەن ەكى باقىتقا جول ءجۇرۋ باعاسى 15-20 مىڭ تەڭگە كولەمىندە كورىنەدى. بۇل رەتتە و ق و- نىڭ تۋريزم ورتالىعى قالادا قوناقۇيدە تۇرۋدىڭ تاۋلىكتىك باعاسى 15 مىڭ تەڭگەنى قۇرايتىنىن (تاڭعى استى قوسا العاندا) دا ايتادى.
ايدار وسپاناليەۆ