تەمىرجولشىلار سۋ تاسۋ قاۋپى بار اۋماقتاردا تاۋلىك بويى كەزەكشىلىك ەتۋدە
ەلىمىزدەگى بارلىق سۋ باسۋ قاۋپى بار تەمىرجول نىساندارىنىڭ بويىندا جاۋاپتى ادامداردىڭ تاۋلىك بويعى كەزەكشىلىگى قامتاماسىز ەتىلدى. بارلىق تەمىرجول بولىمشەلەرىندە ماگيسترالدىق جەلى مەن جاساندى يماراتتاردىڭ قالىپتى جۇمىس جاساۋىنا قاجەتتى العى شارتتار جاسالدى. كوكتەمگى قىزىل سۋ وتەتىن تۇستارداعى قاۋىپتى ورىندار، سۋ شايىپ كەتۋى مۇمكىن توپىراق قاباتى، تەمىرجولدىڭ شىعا بەرىستەرى، بۇرىن بۇلىنگەن مەكەندەردە بارىنشا قىراعى كۇزەت ورناتىلدى.
«ق ت ج» ۇ ك» ا ق جەرگىلىكتى اۋماقتىق ورگاندارمەن بىرلەسىپ سۋ قويمالارىن، اۋىل شارۋاشىلىعى توسپالارىنىڭ جاعدايىن كوميسسيالىق تەكسەرۋدەن وتكىزۋدە.
قازىرگى كەزدە شىعىس قازاقستان وبلىسىنىڭ تەمىرجولشىلارى قىزىل سۋ وتەتىن تۇستاردى اپاتتى جاعدايلاردان ساقتاۋ ءۇشىن بارلىق ءتيىستى شارالاردى قابىلداۋدا. 175 شاقىرىمداعى تۇرعىسىن-زىريان قۋما جولى مەن تيشينسكايا-ريددار باعدارىنداعى 325 شاقىرىمداعى گروموتۋحا وزەنىنىڭ ارناسى ارشىلۋدا.
سونىمەن قاتار تەمىرجول بويىنان قاسات قار ارشىلۋدا. قار تازالاۋ ماۋسىمى باستالعالى بەرى ماگيسترالدىق جول بويىنان 250 مىڭ تەكشە مەتر قار سىرتقا شىعارىلدى.
تەمىرجول بويىن قار جالدارىنان ارشۋ ماقساتىندا قار ارشۋ جانە تازالاۋ تەحنيكالارى جۇمىلدىرىلعان.
«كومپانيانىڭ بارلىق وڭىرلىك بولىمشەلەرىندە تەمىرجول كوپىرلەرىن قىسقى قالدىقتاردان، مۇزدان تازالاۋ، سۋ جۇيەلەرى مەن ارىقتار، سۋ كوزدەرى تۇگەلدەي ارشىلۋدا. تەمىرجول بويىنداعى نىسانداردى، باعىتتاۋىش بۇرمالاردى، تەمىرجول تاباندارىن تازالاۋ سۋ تاسقىنى قاۋپىن بارىنشا ازايتۋعا باعىتتالعان»، - دەيدى «ق ت ج» ۇ ك» ا ق فيليالى-ماگيسترالدىق جەلى ديرەكتسياسىنىڭ اتقارۋشى ديرەكتورى باۋىرجان ءۋالي.