استانادا گاز الدىمەن قاي اۋدانعا تارتىلادى

استانا. قازاقپارات - «سارىارقا» گاز قۇبىرىنىڭ ءبىرىنشى بولىگى ( قىزىلوردا - جەزقازعان - قاراعاندى - تەمىرتاۋ - استانا) اعىمداعى جىلدىڭ سوڭىندا اياقتالادى دەگەن جوسپار بار.

الايدا وعان دەيىن جەرگىلىكتى اكىمدىكتەر گازدى تاراتۋ جۇيلەرىن ازىرلەۋى ءتيىس. سوندا عانا كوگىلدىر وتىن تۇتىنۋشىلارعا تاراتىلادى، دەپ حابارلايدى قازاقپارات ءتىلشىسى.

ق ر ەنەرگەتيكا ۆيتسە-ءمينيسترى ماعزۇم مىرزاعاليەۆتىڭ ايتۋىنشا، گاز قۇبىرى  قىزىلوردانىڭ قاراوزەك اۋلىنان باستاۋ الىپ، الدىمەن استاناعا، سودان سوڭ كوكشەتاۋ مەن پەتروپاۆلعا دەيىن تارتىلادى. «گاز قۇبىرى 2019-جىلدىڭ اياعىنا دەيىن استاناعا جەتەدى. ال ماگيستارل بوس تۇرماۋ ءۇشىن قاراعاندى مەن اقمولا وبلىستارى، سونداي-اق استانا اكىمدىكتەرى گازدى تاراتۋ جەلىلەرىن جوبالاۋدى تەزدەتۋى كەرەك. ءبىز ارنايى جينالىس وتكىزدىك. وسى سالاداعى جۇمىستار باستالىپ جاتىر. ارينە، ءبىراز ۋاقىت قاجەت بولادى. دەگەنمەن، گاز ماگيسترالى استاناعا جەتكەندە العاشقى تاراتۋ جۇيەلەرى دايىن بولادى. قالا اكىمى دە ۋادە بەرىپ وتىر. گاز الدىمەن جىلۋ ەلەكتر ستانتسياسىنا، ودان كەيىن وڭتۇستىك-شىعىس شاعىن اۋدانىنا تارتىلادى. وسىنىڭ ارقاسىندا قالانىڭ ەكولوگياسى دا جاقسارادى. سەبەبى بۇگىندە جەكە تۇرعىن ءۇي سەكتورى كومىر جاعىپ وتىر»، - دەدى م. مىرزاعاليەۆ ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، گازدىڭ ناقتى باعاسى ازىرشە بەلگىسىز. الايدا الدىن الا ەسەپكە سايكەس، ءبىر تەكشە مەتر گازدىڭ باعاسى 47-50 تەڭگە بولادى. «دەگەنمەن، بارلىعى قۇرىلىسقا كەتكەن اقشاعا جانە بەرىلگەن قارجىنىڭ مەرزىمىنە بايلانىستى بولماق»، - دەپ اتاپ كورسەتتى م. مىرزاعاليەۆ.