استاناعا گاز تارتۋ كەزىندە مىڭداعان جۇمىس ورنى اشىلادى - ەنەرگەتيكا مينيسترلىگى

استانا. قازاقپارات -  قر ەنەرگەتيكا ۆيتسە-ءمينيسترى ماعزۇم مىرزاعاليەۆ «سارىارقا» گاز قۇبىرىنىڭ باستى ارتىقشىلىقتارىن اتادى، دەپ حابارلايدى قازاقپارات ءتىلشىسى.

«استانانىڭ جىلۋ ەلەكتر ورتالىعىندا جاعىلاتىن 651 مىڭ توننا كومىردى گاز الماستىراتىن بولادى. سونىڭ ارقاسىندا اۋاعا شىعارىلاتىن زياندى قالدىقتار ەداۋىر ازايادى. ونداي قالدىقتاردىڭ كولەمى جىلىنا 36 مىڭنان اسادى. الايدا جىلۋ ەلەكتر ستانتسياسى گازعا تولىعىمەن كوشە المايدى. گازبەن تەك سۋدى جىلىتۋ قازاندىقتارى عانا جۇمىس ىستەيتىن بولادى. اتالعان جوبانىڭ تاعى ءبىر ارتىقشىلىعى، قۇرىلىس كەزىندە 800 جۇمىس ورنى اشىلادى. ال بارلىق جۇمىستار اياقتالعاننان كەيىن 225 تۇراقتى جۇمىس ورنى بولادى»، - دەدى م. مىرزاعاليەۆ ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، اعىمداعى جىلدىڭ مامىر ايىنا دەيىن جوبالىق-سمەتالىق قۇجاتتامانى ازىرلەپ، شىلدەگە دەيىن ونىڭ بارلىعىن مەملەكەتتىك ساراپتامادان وتكىزۋ كەرەك.

«شىلدەنىڭ باسىندا قۇرىلىستى باستاۋ جانە دانەكەرلەۋدىڭ سالتاناتتى ءراسىمىن وتكىزۋ جوسپارلانىپ وتىر»، - دەپ اتاپ كورسەتتى م. مىرزاعالييەۆ.

ايتا كەتەيىك، «سارىارقا» گاز قۇبىرىن (قىزىلوردا - جەزقازعان - قاراعاندى - تەمىرتاۋ - استانا - كوكشەتاۋ - پەتروپاۆل) كەزەڭ-كەزەڭىمەن پايدالانۋعا بەرۋ كوزدەلگەن. العاشقى كەزەڭدە 1081 شاقىرىمدى قۇرايتىن «قىزىلوردا - جەزقازعان - قاراعاندى - تەمىرتاۋ - استانا» بولىگىن اياقتاۋ قاجەت. وعان 267,3 ميلليارد تەڭگە كەتەدى. اتالعان اقشا ەۋروپالىق قايتا قۇرۋ جانە دامۋ بانكى، ەۋرازيالىق دامۋ بانكى، قازاقستاننىڭ دامۋ بانكى سياقتى قارجى ۇيىمدارىنان تارتىلادى دەگەن جوسپار بار.