مادينا ءسادۋقاسوۆا موڭعولدىڭ «ءحۇني سايحان سەتگەل» ءانىن شىرقايدى
قوس ءانشى جوسپار 14- ناۋرىزدا قوبدادا، ناۋرىزدىڭ 15-ىندە بايان- ولگەي ايماقتارىندا، ال 16-سىندا ۇلانباتىر قالاسىنىڭ ەڭ ۇلكەن كونسەرت زالى «UB palace»- تا جاندى داۋىستا «ارمان ەلىم- اي» اتتى ءان كەشىن كورەرمەندەرگە تارتۋ ەتپەك. قازاقستاندىق انشىلەردى كەشە ۇلانباتىر قالاسىنداعى «شىڭعىس حان» حالىقارالىق اۋەجايىنان ۇيىمداستىرۋشىلار القاسى، جانكۇيەرلەر مەن ب ا ق وكىلدەرى قارسى الدى، دەپ حابارلايدى قازاقپارات ءتىلشىسى.
اۋەجايدا ءانشى ءمادينا ءسادۋاقاسوۆا جۋرناليستەرگە سۇحبات بەرگەن بولاتىن. «بۇل مەنىڭ موڭعولياعا العاشقى ساپارىم ەمەس. وسىدان 10 جىل بۇرىن وسىندا ساپارلاپ كەلگەنمىن. ول كەزدە ناۋرىز كونسەرتىنە قوناق رەتىندە قاتىسىپ، ءان تارتۋىمدى ۇسىندىم. ال قازىر جەكە شىعارماشىلىق كونسەرتىمدى بەرگەلى وتىرمىن. سونداي قۋانىشتىمىن!»، - دەدى ءمادينا ءسادۋاقاسوۆا.
سۇحبات بارىسىندا قازاقستاندىق ءانشى شىعارماشىلىق كەشتىڭ «ناۋرىز» مەيرامىنا وراي ۇيىمداستىرىلعانىمەن، بارشا موڭعول حالقىنا ارنالاتىنىن جەتكىزدى. «بۇل كەشتە موڭعول ەلىنىڭ مادەنيەت قايراتكەرى، ءانشى ەنحزۋلدىڭ ايتىپ جۇرگەن «ءحۇنيي سايحان سەتگەل» نەمەسە «ادامداردىڭ اق نيەتى» اتتى ءانىن موڭعول تىلىندە ورىندايمىن. ءوزىمنىڭ جاڭا تۋىندىلارىمنان ۇسىنامىن. وسىدان 28 جىل بۇرىن بايان- ولگەي ايماعىنىڭ بۇلعىن سۇمىنىنان قازاقستانعا قونىس اۋدارعان، دارىندى كومپوزيتور ياسيرا زاحان قىزىنىڭ تۋعان جەرىنە ارناپ جازعان «بۇلعىنىم» ءانى دە شىرقالاتىن بولادى»، - دەدى ءمادينا ءسادۋاقاسوۆا.
سونداي- اق، ول «ءحۇني سايحان سەتگەل» ءانىنىڭ ماعىناسى مەن اۋەنىن قاتتى ۇناتقانىن، سوندىقتان تاڭداۋى وسى انگە تۇسكەنىن اتاپ ءوتتى. «بۇل ءاندى شەگىنە جەتكىزىپ ورىندايمىن دەپ ويلايىم. دايىندىعىم دا وتە جاقسى. جالپى موڭعول ەلىنىڭ ونەرپازدارىنان ايگىلى انشىلەر ءتوموريين اريۋناا، ءباتمونحيين سارانتۋياا، مەملەكەتتىك سىيلىقتىڭ يەگەرى ءانشى دورجسۇرەنگين بولدلاردىڭ شىعارمالارىمەن تانىسپىن، اندەرىن ءسۇيىپ تىڭدايمىن. وسىندا كەلەردەن بۇرىن موڭعوليادا بالەت ونەرىنىڭ الەمدىك دەڭگەيگە كوتەرىلگەنىن ەستىپ قاتتى قۋاندىم. وسى ءتارىزدى موڭعول ەلىنەن كوپتەگەن جاقسى ىستەردى ۇيرەنۋگە بولادى»، - دەيدى ءانشى.
بۇدان بولەك، م. ءسادۋاقاسوۆا وسى ساپارىنداعى باعدارلاماسىمەن دە ءبولىستى. ونىڭ سوزىنە قاراعاندا، بۇل جولى موڭعوليادا بارلىعى 5 رەت كونسەرت وتكىزۋ جوسپارلانعان.
«قوبدا، بايان- ولگەي ايماقتارىندا جەكە- جەكە كەش وتەدى. ال ۇلانباتىردا ءبىر رەت قويىلادى. كونسەرتتىڭ ۋاقىتى وتە تىعىز. ەگەر اراسى ءجيى ەمەس بولعاندا ياسيرا اپايدىڭ تۋعان جەرى بۇلعىنعا بارۋشى ەدىم. وكىنىشتىسى بۇل جولى بارا المايتىن بولدىم. بۇگىن سونجين بولدوگتاعى «شىڭعىس حاننىڭ» ەسكەرتكىش كەشەنىمەن تانىسامىن. كوڭىل كۇيىم تاماشا!» دەپ جاۋاپ بەردى ءانشى تىلشىلەرگە.
قۋات ۋاتحان ۇلى