قازاقستان مەن قىتاي قورعاستاعى بوگەتتى بىرلەسىپ سالادى

استانا. قازاقپارات - پارلامەنت ءماجىلىسى «قازاقستان ۇكىمەتى مەن قىتاي ۇكىمەتى اراسىنداعى قورعاس وزەنىندە «شۇكىربۇلاق (المالى)» بىرلەسكەن سەل ۇستايتىن بوگەتىن سالۋداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوباسى بويىنشا جۇمىستى باستادى، دەپ حابارلايى قازاقپارات.

«2017-جىلدىڭ ماۋسىمىندا ەكى ەل ۇكىمەتتەرى اراسىندا استانادا جاسالعان كەلىسىم قورعاس وزەنىندە بىرلەسكەن سەل ۇستايتىن بوگەتتى سالۋداعى ىنتىماقتاستىققا باعىتتالعان. وسى ورايدا جوبانىڭ جالپى قۇنىنان تاراپتاردىڭ ءارقايسىسى 50 پايىز كولەمىندە قارجى سالادى»، - دەدى ءماجىلىستىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ ءتوراعاسى گلەب شەگەلسكي جالپى وتىرىس بارىسىندا.

وسى ورايدا ول كوميتەت اتالعان زاڭ جوباسى بويىنشا 2018-جىلعى 12- جەلتوقسانعا دەيىنگى مەرزىمدە قورتىندى ازىرلەۋگە دايىن ەكەنىن اتاپ ءوتتى.

ايتا كەتەيىك، قازاقستان مەن قىتايدىڭ بىرلەسىپ، قورعاس وزەنىندە سالاتىن بوگەتى 9,8 ميلليون تەكشە مەتر سەل ماسساسىن ۇستاي الادى.

بۇدان بۇرىن حابارلانعانداي، 2017-جىلعى 8- ماۋسىمدا اقوردادا قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پەن قىتاي حالىق رەسپۋبليكاسىنىڭ ءتوراعاسى شي جينپيڭنىڭ قاتىسۋىمەن قورعاس وزەنىنىڭ شۇكىربۇلاق بىرلەسكەن سەل ۇستايتىن بوگەتىن سالۋداعى ىنتىماقتاستىق تۋرالى كەلىسىمگە قول قويىلدى.