ماڭعىستاۋداعى امال مەرەكەسى: وتپان تاۋ باسىندا «بىرلىك وتى» جاعىلدى - فوتو

استانا. قازاقپارات - ماڭعىستاۋدا امال مەرەكەسى اتاپ وتىلۋدە. رەسپۋبليكانىڭ تۇكپىر- تۇكپىرىنەن كەلگەن جۇرتشىلىق «وتپان تاۋ» تاريحي-مادەني كەشەنىندە باس قوستى.

قاز-قاتار الپىسقا جۋىق اقشاڭقان كيىز ۇيلەر تىگىلىپ، ءتۇرلى مادەني، سپورتتىق شارالار مەن قولونەر شەبەرلەرىنىڭ كورمە- جارمەڭكەسى وتۋدە، دەپ حابارلايدى قازاقپارات ءتىلشىسى.

ماڭعىستاۋعا ءسوز بەن ۇلتتىق ءداستۇردى قاستەرلەگەن اقىن- جازۋشىلار، ءانشى- جىرشىلار، قوعام قايراتكەرلەرى مەن زيالى قاۋىم وكىلدەرى جينالدى.

ولار «وتپان تاۋ» باسى - بىرلىكتىڭ مەكەنى دەپ سانايدى. مەرەكەگە كەلگەن حالىقتىڭ قاراسى كوپ بولدى. ولاردى تىگىلگەن كيىز ۇيلەر الدىندا اق ورامال تاققان كەلىندەر جىلى شىرايمەن قارسى الىپ، ۇلكەن ىقىلاسپەن ەت پەن ءشايىن ۇسىندى.

شارانىڭ ەرەكشەلىگى، بيىل ول رەسپۋبليكالىق دەڭگەيدە ۇيىمداستىرىلىپ وتىر. ۇيىمداستىرۋشىلاردىڭ ايتۋىنشا، كيىز ءۇي تىزۋدە ءوزىنىڭ اسەمدىگىمەن، كوركىمەن، كوز جاۋىن الاتىن جابدىقتارىمەن ماڭعىستاۋلىقتار كوش باستاپ تۇر.

 

الا تاڭمەن شەتپەدەگى اتشاباردا 25 شاقىرىمدىق الامان بايگە مەن 9 شاقىرىمدىق قۇنان جارىس ءوتتى. سونىمەن قاتار ۇلتتىق ويىننىڭ جالاۋى جەلبىرەپ، اۋدارىسپاقتان جىگىتتەر كۇش سىناستى.

وتپان تاۋ باسىنداعى ءدۇبىرلى توي ۇلتتىق ءبي مەن انگە تولى بولدى. شەبەرلەردىڭ كورمەسىنەن كەرەگىن العان تۇرعىندار دا ءماز- مەيرام.

سونداي-اق جەتىسۋ، ارقا، سىر، باتىس، التاي-تارباعاتاي جىر مەكتەپتەرى وكىلدەرى مەن «مەن قازاقپىن» مەگا جوباسى جۇلدەگەرلەرىنىڭ قاتىسۋىمەن كونسەرتتىك شارا، ءداستۇرلى ءانشى- جىرشىلار ا. كومەكوۆتىڭ، ا. ەلشىبايەۆانىڭ، ءا. ساريننىڭ، ش. سۇلەيمەنوۆتىڭ، ن. جانامانوۆتىڭ جانە ءو. اينيازوۆتىڭ قاتىسۋىمەن جىر كەشى ءوتتى.

 

«مەرەكە قۇتتى بولسىن! امال كەلدى، توي باستالدى! ماڭعىستاۋ جىردىڭ ەلى، قاشاعاننىڭ، ابىل، اقتاننىڭ، سۇگىردىڭ، ءتاتتىعۇلدىڭ ەلى. مۇندا كەلگەن حالىق جىر- تەرمە تىڭداماي كەتپەسە بولمايدى»، - دەيدى «مەن قازاقپىن» مەگا جوباسىنىڭ جۇلدەگەرى وسپان قۇلسىماق.

بۇگىن سونىمەن قاتار امال مەرەكەسى مەن «وتپان تاۋعا» ارنالعان دوڭگەلەك ۇستەل وتىرىسى ءوتتى. وعان ءماشhۇر- ءجۇسىپ مۇراجايىنىڭ، ابايدىڭ «جيدەباي- ءبورىلى» مەملەكەتتىك تاريحي-مادەني جانە ادەبي-مەموريالدىق قورىق مۋزەيىنىڭ، «قورقىت اتا» مەموريالدىق مۋزەيىنىڭ، «ازىرەت- سۇلتان» مەملەكەتتىك تاريحي- مادەني قورىق- مۋزەيىنىڭ، « ۇلىتاۋ» ۇلتتىق تاريحي- مادەني تابيعي قورىق مۇراجايىنىڭ، «حان وردالى سارايشىق» مۋزەي- قورىعىنىڭ وكىلدەرى قاتىستى.

 

ال كەشكى ساعات 20.00-دە تەڭىز دەڭگەيىنەن 532 مەتر بيىكتەگى وتپان تاۋ باسىندا «بىرلىك وتى» جاعىلدى. بۇل - باتىرلارىمىز بەن بيلەرىمىزدىڭ باس قوسىپ، تاعىلىمدى شەشىم قابىلداعان جەرى. ماڭعىستاۋدىڭ سان قيلى سىن ساعاتتارىندا ۇران وتىن جاعىپ، ماڭگىلىك وتىن مازداتقان تاعزىم بيىگىندە امال مەرەكەسى وسىلاي دۇبىرلەپ ءوتتى. شارا ەرتەڭ دە جالعاسىن تابادى.