تۇركياداعى ەلشىلەردىڭ جۇبايلارى قازاقتىڭ ۇلتتىق تاعامدارىنان ءدام تاتتى

استانا. قازاقپارات - قازاقستاننىڭ تۇركياداعى ەلشىلىگىندە انكارادا ورنالاسقان ديپميسسيالار باسشىلارىنىڭ جۇبايلارى باس قوسقان شارا ءوتتى، دەپ حابارلايدى قازاقپارات.

قازاقستاندىق ديپلوماتيالىق وكىلدىكتەن ءمالىم ەتكەندەي، انكاراداعى ەلشىلەر جانە حالىقارالىق ۇيىمدار باسشىلارى ايەلدەرىنىڭ تاڭعى كوكتەيلى اي سايىن وتەدى. ول SHOM Ankara دەپ اتالادى. بۇل جولى جيىن قازاقستان ەلشىلىگىنىڭ رەزيدەنسياسىندا ۇيىمداستىرىلدى.

تۇركياداعى قازاقستان ەلشىسى ابزال ساپاربەك ۇلىنىڭ جۇبايى گۇلبانۋ سىرعابايەۆا قوناقجايلىق كورسەتكەن جيىنعا 40-قا جۋىق مەيمان قاتىستى.

جيىندا SHOM Ankara ءتورايىمىنىڭ ورىنباسارى جانە بەلارۋستىڭ تۇركياداعى ەلشىسىنىڭ جارى ۆەرا ساۆينىح بۇگىنگى كۇن تارتىبىندەگى ماسەلەلەرگە توقتالدى. اتاپ ايتقاندا، لەيكەميا دەرتىنە شالدىققان بالالارعا كومەكتەسۋ ءۇشىن  LÖSEV قورىنا جينالعان قاراجات جانە باسقا دا قايىرىمدىلىق جۇمىستارى تالقىلاندى. سونداي- اق SHOM Ankara جاڭا مۇشەلەرىن تانىستىرعان ۆ. ساۆينىح ۇيىمنىڭ الداعى جوسپارلارىمەن ءبولىستى.

شارا اياسىندا تاسپالى كەستە ىسىمەن اينالىساتىن گ. سىرعابايەۆا قاتىسۋشىلارعا ءوز جۇمىستارىن كورسەتىپ، اتالمىش ونەردىڭ قىر- سىرىمەن ءبولىستى.

سونداي- اق قوناقتار نازارىنا قازاقستاننىڭ مادەنيەتى مەن ەكونوميكاسىن، تۋريستىك الەۋەتىن سۋرەتتەيتىن بەينەبايان ۇسىنىلدى. ال «وتاۋ» فولكلورلىق ءانسامبلىنىڭ ونەرپازدارى قازاقتىڭ ءداستۇرلى اسەم ءبيى مەن اۋەندەرىن پاش ەتتى.

 مەيماندارعا ارنالىپ قازاقتىڭ ۇلتتىق تاعامدارىنان داستارحان جايىلدى.