اقتوبە وبلىسىندا ناۋرىز مەرەكەسى ەرتەڭ باستالادى. قىزىلوردادان ەستەفەتا الاتىن جاستار تۇڭعىش پرەزيدەنت اتىنداعى ساياباققا جينالىپ، «امال كەلدى. جىل كەلدى» اتتى شارا وتكىزەدى. بۇل كۇنى باۋىرساق تاراتىلىپ، جاستار فلەش- موب ۇيىمداستىرادى.
«ۇلتتىق سالت- ءداستۇردى ناسيحاتتاۋ ماقساتىندا ناۋرىز مەرەكەسى ءبىر اي بويى تويلانادى. 15 -ناۋرىز كۇنى كەشكىلىك جاستار كەشى ۇيىمداستىرىلادى. التىباقان جانىنا جينالاتىن جاستار دومبىرا تارتىپ، ءان ايتادى، بي بيلەيدى. بۇل تەك وبلىس ورتالىعىندا ەمەس، اۋدان، اۋىلدا وتەدى. مەكتەپكە دەيىنگى ۇيىمداردا، مەكتەپتەردە ەنە مەن كەلىن، اتا مەن بالا اراسىندا ءتۇرلى سايىستار وتكىزىلىپ، اقساقالدار باتا بەرەدى. مادەني شارالارمەن قاتار، سپورتتىق جارىستار ۇيىمداستىرىلماق. «باقىتتى بالا» جوباسى اياسىندا 21 - ناۋرىزدا قايىرىمدىلىق اكسياسى وتەدى» ، - دەدى وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى مارجان قورعانبايەۆا.
ناۋرىز مەرەكەسى كۇنى اقتوبەدە باس داڭعىل ۋاقىتشا جابىلىپ، قازاق حالقىنا مىڭ تاعزىم ستەللاسىنىڭ ماڭىنا 7 كيىز ءۇي تىگىلەدى. كيىز ۇيلەردە كورمە ۇيىمداستىرىلادى. تاقىرىبى: «مەن اقتوبەلىكپەن» ، «تۋعان جەرگە تاعزىم» ، «باقىتتى بالا - ماڭگىلىك ەل كەپىلى» ، «رۋحاني جاڭعىرۋ» ، «ناۋرىز - جىل باسى» ، «انالارعا تاعزىم» ، «استانانىڭ 20 -جىلدىعى» . مۇنىڭ ءبارىن قالا تۇرعىندارى تاماشالاپ، تانىمىن كەڭەيتۋگە مۇمكىندىك بەرىلەدى.
«اقتوبە قالاسى بويىنشا 850 مەترلىك داستارقان جايىلادى. بارلىعى 4,1 مىڭ ليتر ناۋرىز كوشە، 6,8 توننا پالاۋ جانە 7,5 توننا باۋىرساق تاراتىلادى. بارلىعى 200 كاسىپورىن، مەكەمە، بيزنەس سۋبەكتىلەرى 63 كيىز ءۇي تىگەدى» ، - دەدى اقتوبە قالاسى اكىمى ورىنباسارىنىڭ مىندەتىن اتقارۋشى كۇلپارشىن ايدارحانوۆا.
ايتا كەتەيىك، بيىل ورتالىق كوشەلەردەگى كيىز ۇيلەردىڭ بارىندە كورمە ۇيىمداستىرالادى. ال تاعامدار كوشەدەگى ارنايى داستارقاندا تەگىن تاراتىلادى. جەرگىلىكتى اكىمدىك «اقتوبەدە جاسالعان» اتتى ۇلتتىق تاعامدار كورمەسىن ۇيىمداستىرادى. سونىمەن قاتار، شۇبات پاتي وتەدى.