ءۇش كۇن بويى تولاسسىز جاۋعان نوسەر جاۋىننان سوڭ تاسقىن سۋ حالىقتى ابىگەرگە سالدى. اياگوز اۋدانىندا توتەنشە جاعداي جاريالانعان. كوشەلەر مەن ۇيلەردى سۋ باسىپ، ادامدار قاۋىپسىز اۋماققا كوشىرىلدى. وسكەمەندە ءتورت ءۇي مەن بىرنەشە كوشەنى سۋ باستى. سۋدىڭ ورتاسىندا قالعان ادامدار وسىلاي تراكتوردىڭ كومەگىمەن قۇتقارىلعان. جاۋىن- شاشىننان 40 شاقتى ءۇي مەن بىرنەشە ورتالىق كوشەگە سۋ جايىلدى. اۋماقتا تابيعي سيپاتتاعى توتەنشە جاعداي جاريالاندى. قاۋىپسىزدىك ءۇشىن تۇرعىندار جەرگىلىكتى مەكتەپكە جايعاستىرىلعان. ال بۇل - وسكەمەن. شاحارعا ءۇش كۇندە ەكى ايلىق مولشەردەگى جاۋىن- شاشىن ءتۇستى. ارىقتار قوقىسقا تولىپ قالعاندىقتان، قىزىل سۋ ارناسىنان اسىپ، ۇيلەرگە قاراي لاپ قويعان.
مىنە سۋدى شىعارىپ جاتىر، ءبىراق موتورلارى ناشار، بىزگە كومەكتەن تراكتور كەرەك بولىپ تۇر، ەكسكاۆاتور. مىنا جولدى قازىپ، سۋدى ارى قاراي شىعاراتىن. ەندى سول ەكسكاۆاتوردى دا تابا الماي وتىرمىز»، - دەيدى وسكەمەن قالاسىنىڭ تۇرعىنى ولجاس مۇقاشيەۆ.
باقشانى تۇگەل سۋ باستى. توتەنشەلىكتەر قۇم سالىنعان قاپتاردى اكەپ مىنا جەرگە توكتى، ەكىنشىسىن انا جەرگە. سۋدىڭ جولىن بوگەپ الەك بولدىق. كورشىلەر دە وسى جەردەن الدى»، - دەيدى تۇرعىن يسمايل يسمايلوۆ.
ال قۇمار فايزراحمانوۆ وتباسىمەن بىرگە كورشىسىنىڭ ۇيىنە تۇنەپتى. توپان سۋ باسپانامىزدىڭ تەرەزەسىنە دەيىن جەتتى دەيدى. بۇكىل جيھاز، تۇرمىستىق تەحنيكا، كيىم- كەشەك سۋدىڭ ورتاسىندا قالىپ قويعان. شاعىن سۋ سورعىش قۇرالدىڭ كۇشى ارىنى قاتتى سۋعا جەتپەي، سالدارىنان تاعى ءۇش ءۇي وسىنداي جاعدايعا تاپ بولدى. ال مىناۋ ساتبايەۆ داڭعىلى. ەرتىستىڭ ەكى بەتىن جالعايتىن وبلىستىق ماڭىزداعى كۇرە جولدىڭ ءبىرى كوپشىلىكتىڭ كوز الدىندا وزەنگە اينالدى. كولىك قوزعالىسى قيىندادى. ءتىپتى قوعامدىق كولىكتەگى جولاۋشىلاردى قۇتقارۋعا تۋرا كەلگەن. تۇندە قاتتى اياز بولىپ، تاڭەرتەڭ قالا مۇز قۇرساندى. جولداردا قوزعالىس مۇلدە توقتاعان. اپاتتى جاعدايدىڭ سالدارىن جويۋ مەن جولداعى قىزمەتتەردى رەتتەۋدى وبلىس اكىمىنىڭ ءوزى باقىلاۋعا الدى.
«استانا» ارناسىنا بەرگەن سۇقباتىندا ايماق باسشىسى، شۇعىل ارەكەت ەتكەندە، تىم بولماعاندا، قالادا توتەنشە جاعدايدىڭ الدىن الۋعا بولار ەدى، دەگەندى ايتتى.
دانيال احمەتوۆ، شىعىس قازاقستان وبلىسىنىڭ اكىمى:
شۇعىل قىزمەت دۇرىس جۇمىس ىستەمەگەن. مەن تاعى ايتام، بۇل ءتىپتى ۇيات، ماسقارا. بىلدەي باسقارما مەن قالا اكىمى بىرلەسىپ ءتورت ۇيدەگى سۋدى سورا الماۋ نە دەگەن سۇمدىق. قالا بويىنشا 4 سورعى تابىلماعان با؟ ! بۇل ەشقانداي دا شۇعىل ارەكەت جاسالماعان دەگەن ءسوز. مەن مۇنى جاي قالدىرمايمىن»، - دەيدى وبلىس باسشىسى.
وسى جاعدايعا بايلانىستى وسكەمەن، ريددەر قالالارىنداعى مەكتەپتەر مەن كوللەدج ستۋدەنتتەرىنە ساباق توقتاتىلدى. وبلىستىق جانە رەسپۋبليكالىق ماڭىزى بار جولدارعا مەرزىمدى شەكتەۋلەر قويىلعان. تاۋلى ايماقتا قار كوشكىنى قاۋپى ءالى دە ساقتالۋدا. ءۇش كۇندە 70 ءۇي، 150 اۋلا، 110 ساياجاي سۋ ورتاسىندا قالدى. 400 ادام قاۋىپسىز جەرگە كوشىرىلگەن. بيلىك زارداپ شەككەندەردىڭ بارلىعىنا كومەك كورسەتىلەدى دەپ سەندىردى. ال جۇرگىزۋشىلەردى قالا تۇرعىندارىن تەگىن تاسىمالداۋعا ۇندەدى. مۇنداي باستاما الەۋمەتتىك جەلىلەر ارقىلى تاراپ جاتىر. قازىر ايماقتا قۇتقارۋ قىزمەتى توتەنشە جاعداي رەجيمىنە كوشكەن. جولدار، كوپىرلەر مەن بوگەتتەرگە قۇم توسەلۋدە. 13 مىڭ تەكشە مەتردان استام سۋ سورىلعان. توتەنشە جاعداي ماماندارى مەن اكىمدىك وكىلدەرى اپاتتىڭ سالدارىن جويىپ، الدىن الۋ جۇمىستارىن جۇرگىزۋ ءۇشىن اياگوز اۋدانىنا جول جۇرمەك.