الماتىلىقتار ەڭ ۇزىن قۇراق كورپە تىگىپ، تاريحتا قالماق

الماتى. قازاقپارات - الماتىدا ەڭ ۇزىن قۇراق كورپە تىگىلەدى، دەپ حابارلايدى قازاقپارات ءتىلشىسى.

قالالىق اكىمدىكتىڭ حابارلاۋىنشا، ەڭ ۇزىن قۇراق كورپە تىگۋ جۇمىسى الماتىدا «ناۋرىز-2018» مەرەكەسى اياسىندا قولعا الىنعالى وتىر.

«مەگاپوليستە «گينەسستىڭ رەكوردتار كىتابىنىڭ» جاڭا رەكوردى جاسالماق. قۇراق كورپەنىڭ ۇزىندىعى 25500 شارشى مەتر بولادى. رەكورد جاسالىپ، سەرتيفيكات الىنعان سوڭ كورپە قۇراقتارى ءتۇرلى كورمەلەرگە قويىلادى. قۇراق كورپە تىگۋ جونىندەگى شەبەرلىك سىنىبىنا قاتىسۋعا نيەت بىلدىرۋشىلەردىڭ بارلىعى 10- ناۋرىزدان باستاپ www.nauryzfest2018.kz. سايتىنا تىركەلۋلەرى ءتيىس. اتاۋلى شارا «ناۋرىز-2018» اتتى ناۋرىز مەرەكەسىنە وراي 22- ناۋرىزدا باستالىپ، قىركۇيەكتە وتەتىن الماتىنىڭ «قالا كۇنىندە» اياقتالادى. جوبانى جۇزەگە اسىرۋ ءۇشىن قالانىڭ 25 كىتاپحاناسىنان كورپە ەلەمەنتتەرى قابىلدانادى»، - دەيدى ۇيىمداستىرۋشىلار.

ايتا كەتەرلىگى، بۇعان دەيىنگى ۇزىن كورپە رەكوردى 2000-جىلى پورتۋگاليانىڭ پورتو قالاسىندا جاسالعان. وندا ۇزىندىعى 25100 شارشى مەتر «Manta da Cultura» كورپەسى تىگىلگەن.

«قۇراق كورپەنىڭ ءار بولشەگى وتانىمىزدىڭ سان الۋاندىعىن: ونىڭ دالاسىن، تاۋى مەن وزەنىن كورسەتەدى، ال باستى سيمۆول - حالىقتىڭ بىرلىگى. قازاقستاندا 130 دان استام ۇلت تۇرادى. كورپەنىڭ قۇراقتارى تۇتاس جامىلعىعا اينالىپ، ەلىمىزدىڭ تۇتاستىعىن پاش ەتەدى»، - دەدى جوبانىڭ باستى ۇيىمداستىرۋشىسى الماتى قالاسى مادەنيەت جانە مۇراعاتتار باسقارماسى.

ەسكە سالا كەتەيىك، 21-25- ناۋرىز ارالىعىندا ساعات تاڭعى 10:00 مەن كەشكى 21:00 گە دەيىن مەگاپوليستەگى الاڭدارىندا «ناۋرىز-2018» مەرەكەسى تويلانادى. ال 22- ناۋرىزدا استانا الاڭىندا ۇلكەن كونسەرت، ۇلتتىق اس ءمازىرى بويىنشا فەستيۆال ۇيىمداستىرىلادى.

اۆتور: الماس مۇقاش ۇلى