جالاقىسى تومەن جۇمىسكەرلەردىڭ تابىس سالىعىن ازايتۋ ماسەلەسى پىسىقتالادى - تيمۋر سۇلەيمەنوۆ

استانا. قازاقپارات - جالاقى مولشەرى تومەن جۇمىسكەرلەردىڭ جەكە تابىس سالىعىن ازايتۋ ماسەلەسى پىسىقتالادى.

بۇل تۋرالى بۇگىن ۇكىمەت وتىرىسىندا پرەزيدەنتتىڭ 5 الەۋمەتتىك باستاماسىن جۇزەگە اسىرۋ جول كارتاسىنىڭ جوباسىن تانىستىرعان ق ر ۇلتتىق ەكونوميكا ءمينيسترى تيمۋر سۇلەيمەنوۆ ايتتى، دەپ حابارلايدى قازاقپارات.

ونىڭ ايتۋىنشا، ەلباسىنىڭ 5 باستاماسىنىڭ جالاقىسى تومەن جۇمىسشىلاردىڭ ەڭبەكاقىسىن كوبەيتۋ ءۇشىن ولاردىڭ سالىق جۇكتەمەسىن ازايتۋ باعىتىنىڭ ورىندالۋىنا ۇلتتىق ەكونوميكا مينيسترلىگى جاۋاپتى بولادى.

«بۇل باعىت شەڭبەرىندە سالىق زاڭناماسىنىڭ نورمالارىن وزگەرتۋ بويىنشا ۇسىنىستار ازىرلەۋ جوسپارلانىپ وتىر. جالاقى مولشەرى تومەن جۇمىسكەرلەردىڭ جەكە تابىس سالىعىنىڭ مولشەرىن ازايتۋ ماسەلەسى پىسىقتالاتىن بولادى»، - دەدى مينيستر.

سونىمەن قاتار ول جەكە تابىس سالىعىن سالۋ ءتارتىبى مەن اكىمشىلەندىرۋ تەتىگىن قاراۋ جوسپارلانىپ وتىرعاندىعىن ايتتى.

«بۇدان باسقا جەكە تابىس سالىعىنىڭ پروگرەسسيۆتى شاكىلىن ەنگىزۋ مۇمكىندىگى زەردەلەنەتىن بولادى. ءىس-شارالار تامىز ايىندا اياقتالادى. الايدا جاڭا تەتىكتى ەنگىزۋ جاڭا سالىق كەزەڭىنىڭ باستالۋىنا بايلانىستى 2019-جىلعى 1- قاڭتاردان باستاپ كۇشىنە ەنەدى»، - دەدى تيمۋر سۇلەيمەنوۆ.