قورعاۋشىسى اقجارقىن تۇرلىبايدىڭ قىتاي تۇرمەسىندەگى جاعدايى تۋرالى ايتتى
زاڭگەر ايتىپ وتكەندەي، اقجارقىن تۇرلىباي قىتاي تەرگەۋ يزولياتورىندا سوت ۇكىمىن كۇتىپ وتىر. بيىل ناۋرىزدىڭ باسىندا سوڭعى رەت كەزدەسۋ بولعان. سول كەزدە اقجارقىن دەنساۋلىعىنىڭ ءبىر قالىپتى ەكەنىن، الداعى پروتسەسكە دايىندىعى جايلى ايتقان.
«بۇدان بولەك، تەرگەۋ يزولياتورىندا پايدالانۋ ءۇشىن دەپوزيت الۋعا مۇمكىندىك بەرىلدى. جىبەرگەن قاراجاتقا اقجارقىن قوسىمشا ازىق- تۇلىك، سۋسىن ساتىپ الا الادى»، - دەپ حابارلادى نۇرماعانبەتوۆ.
ونىڭ ايتۋىنشا، وسى ءتورت جىلدىڭ ىشىندە اقجارقىننىڭ تۇرمەدەگى جاعدايىن جاقسارتىپ، وتانىنا قايتارۋ ءۇشىن ءسىم وكىلدەرى دە ارالاسىپ، قولدان كەلگەننىڭ ءبارى جاسالىپ جاتىر. سوت وتىرىسىنىڭ قاشان بولاتىنى قازىرگە ناقتى ەمەس.
«سوت كۇنى بەلگىلى بولعا سوڭ، اقجارقىننىڭ وتباسىنىڭ ءبىر مۇشەسىمەن پروتسەسكە قاتىسۋعا بارامىز. ءبارى جىلدام بولۋى ءۇشىن، قىتاي ۆيزاسىن الدىن الا دايىنداپ قويدىق»، - دەپ جازدى ادۆوكات.
ەستەرىڭىزگە سالا كەتسەك، تۇرلىباي 2014 -جىلى ناۋرىزدا گۋاڭجوۋ قالاسىنىڭ اۋەجايىندا ەسىرتكى كونترابانداسىمەن اينالىستى دەگەن كۇدىكپەن ۇستالعان ەدى. 2015 -جىلى ماۋسىمدا 21 جاستاعى قىز ءومىر بويىنا باس بوستاندىعىنان ايىرۋ جازاسىنا كەسىلدى. كەيىن اپەللياتسيالىق سوت بۇل شەشىمنىڭ كۇشىن جويعان.
2016 -جىلى قاراشادا اپەللياتسيالىق سوت تىڭداۋى ءوتىپ، كوللەگيا شەشىم قابىلداۋ ءۇشىن جينالىس بولمەسىنە شىعىپ كەتتى. اقجارقىن ءبىر جىلدان اسا سوت ۇكىمىن كۇتىپ وتىر.